O cambio de plan do Celta con que Benítez gaña crédito
Meteu sete xogadores de corte defensivo no Sadar e o resultado foi o mellor de toda a temporada
Tiña outro semblante Benítez en Pamplona tras a cuarta vitoria da temporada, a máis clara e seguramente a máis fiel ao estilo Benítez. Ata sete futbolistas de corte defensivo estiveron no once de saída. Só Larsen arriba e sen Iago Aspas. E con esa carta de presentación, un gol do noruegués e outro de Luca de la Torre nun lapso de dous minutos levaron o Celta ao descanso cunha vantaxe clara.
A defensa ben fornecida con Tapia, o debutante Manquillo no lateral e un mediocentro con Beltrán e Jailson controlaron a posible reacción do Osasuna. E foi o Celta quen sentenciou no 89 co gol de Douvikas a pase medido de Jailson. O grego xogou media hora e marcou o seu cuarto gol na liga, que sumado aos seis da Copa fai unha media espectacular. O crédito que perdeu o Celta coa eliminación da Copas recuperouno no Sadar.
As achegas das fichaxes de inverno, máis ala do debut testemuñal de Allende, foron outra boa noticia. A discutida proposta de Benítez ten traza de continuar o vindeiro domingo no Coliseum de Xetafe.
