O Burela seguirá adiante cun proxecto máis austero liderado por José Luis Sáez
O equipo galego máis laureado no fútbol sala estaba nunha situación crítica despois de perder o seu principal patrocinador e había serio risco de desaparición
Ao bordo da desaparición, o Burela Fútbol Sala atopou un grupo de traballo que entende que o club é viable. Está liderado por José Luis Sáez, ex vicepresidente da entidade da Mariña. O equipo descendeu hai uns días da Primeira División masculina e opta ao título na Primeira División feminina onde é un dos equipos máis importantes de España.
Sáez e a súa xunta directiva están canalizando todo o diñeiro que entra para pagar os atrasos nos salarios aos empregados, preto dos cincuenta entre o equipo masculino e o feminino. Agardan resolver a situación desta temporada ao longo do verán e iniciarán a vindeira campaña cun proxecto máis austero.
Para Sáez os éxitos deste ano do equipo feminino -Copa Xunta, Copa da Raíña- teñen o dobre de valor pola situación de impagamentos e con este pulo que acaba de ter a entidade soña con traer un novo título de liga para Galicia.
