A China suspende as emisións de LaLiga tras refererirse Mbappé a Mao como "ditador"

A televisión estatal chinesa CCTV suspendeu as retransmisións da liga española de fútbol e dos partidos relacionados co dianteiro do Real Madrid Kylian Mbappé, tras a polémica por unhas declaracións do francés sobre un meme que o compara con Mao Zedong.

A polémica comezou logo de que Mbappé, preguntado durante unha recente entrevista polo seu meme favorito, dixera: "Co que máis me rin é ese en o que usan a miña cara nun ditador chinés. Utilízoo moito cos meus amigos".

Aínda que o futbolista non mencionou especificamente ningún dirixente, nos últimos meses popularizárase en redes sociais unha imaxe que mostra o seu rostro superposto a un retrato do exlíder chinés Mao Zedong.

Na China, as sátiras sobre antigos líderes e personalidades salientables vinculadas ao Partido Comunista Chinés están perseguidas baixo o delito de "difamación de heroes e martires".

Así as cousas, tras a polémica chegaron as consecuencias e a televisión estatal chinesa decidía cancelar a emisión dos partidos e tamén a retirada de todos os anuncios e vídeos protagonizados polo futbolista.

A decisión súmase ás anunciadas este martes por varias empresas chinesas, entre elas o grupo de bebidas Dongpeng e as compañías lácteas Mengniu e Milkground, que comunicaron o cesamento da súa cooperación comercial con Mbappé ao expresar o seu rexeitamento a comportamentos que firan os sentimentos do pobo chinés.

A controversia súmase a outros episodios recentes relacionados con entidades do fútbol español na China, onde en setembro medios oficiais criticaron o Real Madrid por unha mensaxe que mencionaba conxuntamente O Nepal e O Tíbet tras unha riada, unha formulación considerada "incorrecta" pola prensa local.

En abril, o F. C. Barcelona pediu desculpas tras a aparición dunha bandeira de Taiwán nunha páxina vinculada á súa academia internacional, mentres que en febreiro o Real Madrid difundiu desculpas atribuídas ao seu defensa Dean Huijsen por republicar en Instagram un contido cualificado de racista e ofensivo cara aos cidadáns asiáticos. 

Nesta ocasión polémica con Mbappé chegou ata o Goberno chinés, que a través do Ministerio de Exteriores advertiu que as palabras e os actos que "feren os sentimentos do pobo chinés serán rexeitados por todos os sectores da sociedade".

O diario oficialista Global Times recolleu as peticións de desculpas de internautas chineses, que difundiron na rede social Weibo -semellante a X, censurada na China- unha etiqueta equivalente a "Mbappé aínda debe unha desculpa", e sinalou que a controversia desatara críticas contra o xogador.

As repercusións estendéronse a plataformas deportivas e redes sociais chinesas, onde varios servizos retiraron, modificaron ou restrinxiron contidos relacionados co dianteiro.

O portal deportivo Dongqiudi substituíu o nome de Mbappé pola expresión chinesa 'chá wú cǐ rén', equivalente a "non existe tal persoa", na clasificación do Balón de Oro de 2026, na que terminou segundo, por detrás do inglés Harry Kane e por diante do español Lamine Yamal.

O medio tamén publicou unha fotografía en branco e negro do futbolista, un tratamento visual que nas redes sociais chinesas adoita asociarse con persoas falecidas, tras cualificar as súas declaracións de "inaceptables" o luns.

Mbappé pide desculpas e di que o comentario foi "desafortunado"

Tras a polémica Kylian Mbappé emitiu un comunicado no que se desculpa co pobo chinés. "O meu comentario foi desafortunado", di. "Entendo que feriu a moita xente na China e nas comunidades chinesas de todo o mundo".

"Pido desculpas polo malestar que causaron as miñas palabras", continúa, "non era a miña intención".

https://t.co/MQBo9NCSy5

— Kylian Mbappé (@KMbappe) October 27, 2026

"Teño un fondo respecto pola xente da China e a súa historia, e estou sinceramente arrepentido", conclúe Mbappé.

LaLiga lamenta as declaracións de Mbappé e traballa para superar a situación

LaLiga lamentou "profundamente a ofensa que os comentarios de Kylian Mbappé causaron entre os afeccionados chineses" e asegurou que traballa cos seus socios e interlocutores institucionais na China para abordar a situación, ante a suspensión na televisión estatal CCTV das retransmisións da competición española.

"Estes comentarios foron realizados a título privado e non representan a LaLiga. Na medida da nosa responsabilidade institucional, pedimos desculpas en nome de LaLiga e de todos os seus clubs", afirmou este martes o organismo.

Nunha mensaxe en redes sociais, LaLiga asegurou que "o fútbol español defende o respecto, a convivencia e a unión entre persoas de todas as culturas".

"Trasladamos o noso respecto á China, ás súas institucións e ao seu pobo, e valoramos profundamente o apoio dos millóns de afeccionados que nos seguen cada semana. Reafirmamos o noso compromiso cunha relación construída durante anos", engadiu.

LaLiga tamén confirmou que traballa cos seus socios e interlocutores institucionais na China para abordar esta situación e que poñerá en marcha, "en colaboración cos clubs e os xogadores, un protocolo de sensibilización e comunicación que promova o respecto ás distintas culturas e contribúa a previr situacións similares".

O presidente do organismo, Javier Tebas, tamén trasladou persoalmente as desculpas de LaLiga ao pobo chinés e lembrou que durante moitos anos construíron " unha relación de respecto, confianza e cooperación coa China, as súas autoridades, as súas institucións deportivas, os seus operadores audiovisuais e millóns de afeccionados ao fútbol español".

"Non podemos permitir que unha actuación individual embace esa relación nin prexudique aos máis de 20 clubs das nosas competicións profesionais e a millóns de afeccionados chineses", agregou.