O Breogán logra a 12.ª vitoria da temporada fronte ao Zaragoza (90-85)
O equipo lugués asegura a permanencia e pode pensar en metas maiores
O baloncesto no Pazo é outro deporte. Ten uns condionantes ambientais únicos que permiten que pasen cousas incribles. Quen máis e quen menos xa comezaba a asumir a derrota cando o Zaragoza obtivo oito puntos de vantaxe con menos de tres minutos por xogarse. Poucos optimistas agardaban que daquela respondería o Breogán cun parcial de 14-0 en dous minutos xustos que lle darían o triunfo.
E quen gardaría que a canastra que quede deste partido sexa unha afastadísima tripla de Dae Dae Grant que lles daba aos lucenses catro puntos de renda. O seu atrevemento e a súa ousadía exemplifican o carácter do equipo de Luis Casimiro.
Grant anotou 20 puntos; el e mais Nakic e os incansables Kurucs e Edin Atic foron os líderes da revolta breoganista ante un Zaragoza liderado por dous ex. Bell- Haynes, 22 puntos, e Sulejmanovic castigaron un Breogán que liderou en varias ocasións e estivo contra as cordas nese referido final.
A décimo segunda vitoria, a que adoita garantir a permanencia, está no peto. Con seis partidos por diante só queda gozar coas emocións que transmite este equipo.
