O aeroporto da Santiago bota o peche durante 35 días por obras

O aeroporto de Santiago bota o peche este xoves durante 35 días para renovar a súa pista. A obras obrigarán a reorganizar temporalmente o tráfico aéreo en Galicia. A meirante parte dos desvíos faranse á terminal da Coruña. Estas son as claves duns traballos que se producen en pleno debate sobre a necesidade de mellorar e facer máis competitivos os aeródromos galegos.

Renovación da pista

O aeroporto compostelán da Lavacolla permanecerá pechado entre o 23 de abril e o 27 de maio para renovar por completo a súa pista, que non se actualizaba desde o ano 2008.

As obras xa arrincaron a mediados de xaneiro, pero en horario nocturno, por tanto non afectaran ao tráfico aéreo.

Alén do pavimento da pista, renovaranse os sistemas de axudas á aterraxe en condicións de baixa visibilidade.

Alvedro, o máis beneficiado

O aeroporto coruñés de Alvedro é o máis beneficiado polo peche, xa que absorberá gran parte do tráfico da Lavacolla durante os 35 días que permanecerá sen servizo.

A Coruña ten actualmente entre 20 e 30 voos diarios e aumentará ata nun 70 % o seu tráfico, ata superar os 40 e, en momentos puntuais, os 50 ao día.

Aos seis destinos que ten agora -Madrid, Barcelona, Tenerife Norte, Gran Canaria, Xenebra e Milán- sumaranse outros cinco, con voos a Sevilla, Málaga, Palma de Mallorca, Londres (Heathrow) e París, alén de reforzos nas rutas a Barcelona, Gran Canaria e Tenerife Norte.

No aeroporto de Vigo só está previsto reforzar a conexión con Barcelona durante o peche da Lavacolla.

Reforzo do transporte coa Coruña

Para facer fronte ao novo fluxo de pasaxeiros, Alvedro aumentará en 700 as prazas de aparcamento, engadidas ás 1.200 actuais e con autobús lanzadeira gratuíto, e habilitará unha nova entrada na terminal e unha porta de embarque e outra de desembarque adicionais.

Tamén ofrecerá 60 novas prazas de aparcamento para vehículos de alugueiro, aumentará a capacidade para o servizo de taxi e ampliará a capacidade para restauración.

Para facilitar os desprazamentos, a Xunta anunciou un reforzo das conexións en autobús entre a estación intermodal de Santiago e o aeroporto coruñés.

Recuperar pasaxeiros, o reto da Lavacolla

O peche chega durante a peor crise de viaxantes na Lavacolla desde a pandemia, xa que pasou de alcanzar en 2024 unha marca de máis de 3,6 millóns de pasaxeiros a perder máis de medio millón nun ano.

Mentres os outros dous aeroportos galegos crecen, en 2026 rexisráronse 180.000 viaxeiros menos no primeiro trimestre, un derrubamento de case o 30 %.

Gran parte deste descenso está relacionado co peche da base de Ryanair na terminal compostelá, aínda que os expertos sinalan outros factores como a AVE a Madrid e unha deficiente política de captación de voos.

 Novas rutas

Coa pista renovada, A Lavacolla espera iniciar unha nova etapa con máis rutas internacionais para atraer viaxantes e cambiar a tendencia dos últimos meses.

Esta tempada contará con 12 destinos internacionais e terá voos directos, por primeira vez, con tres continentes diferentes.

As principais novidades son a conexión de United Airlines con Nova York, a través do aeroporto de Newark,l e os voos a Marrakech operados por Vueling, que tamén incorpora, no plano nacional, roteiros a Eivisa e Xerez.

Cara a un novo modelo para o sistema aeroportuario galego

Mentres se pecha temporalmente a pista compostelá, Aena e o resto de actores implicados no sistema aeroportuario galego, como as administracións estatal, autonómica, provincial e local e mais o sector do turismo, traballan nun modelo a futuro con máis coordinación entre as tres terminais.

O plan pasa por captar novas rutas para os tres aeroportos e a Xunta anunciou un apoio de 100.000 euros para promoción turística en orixe para cada nova conexión.

Tamén xurdiron propostas máis polémicas como a da Agrupación Industrial de Turismo de Galicia, que suxeriu especializar os aeroportos da Coruña e Vigo cara ao sector profesional e de negocios e o de Santiago para voos turísticos.