O acusado de prender lume á súa exparella en Valadares di non lembrar os feitos

O home acusado de tentativa de asasinato tras supostamente prender lume á súa exparella en setembro de 2024 en Vigo declarou que non lembra o ocorrido. Dixo que se arrepentiu ao darse conta de que fixera algo malo e chamou ao seu curmán para entregarse á policía.

Así o sinalou durante a vista celebrada este martes na sección cuarta da Audiencia Provincial de Pontevedra. O home, que se enfronta a case 22 anos de cárcere, explicou que o día anterior coincidira coa vítima nunha cafetería, aínda que non falou con ela nin se achegou a ela e relatou que esa noite consumira alcol e outras drogas como cocaína e pastillas e que apenas durmira tres horas.

Segundo indicou, facíao desde os 14 anos e estaba en tratamento psiquiátrico, aínda que non acudía a todas as citas médicas e en dúas ou tres ocasións tratou de atentar contra a súa propia vida.

A Fiscalía pide para el case 22 anos de cadea por acoso, asasinato con aleivosía e asañamento en grao de tentativa. Esixe tamén o pago dunha indemnización á vítima de máis de 670.000 euros polas secuelas causadas.