O accidente da mina de Cangas del Narcea debeuse a un afundimento "súbito e fortuíto"

O accidente da mina de Cangas del Narcea, en que o pasado venres morreron dous mineiros, debeuse ao afundimento "súbito, fortuíto e imprevisto" do teito dunha galería, segundo afirmou este luns o conselleiro de Ciencia, Industria e Emprego do Principado, Borja Sánchez.

Á espera de que a investigación avance, "todo fai indicar" que se produciu por un "afundimento súbito" do teito dunha zona de extracción nunha galería duns 70 metros, onde se atopa unha capa de mineral "bastante ancha", duns tres metros.

A empresa ten todos os permisos en regra, segundo o conselleiro de Industria

Na comparecencia de prensa posterior á reunión semanal do Consello de Goberno, Sánchez avanzou que o Servizo de Minas do Principado vai levar a cabo unha investigación á marxe da que acometa a Policía Xudicial da Garda Civil.

O conselleiro lembrou que a empresa mineira, TYC Narcea, ten todos os permisos e a documentación en regra e que pasou distintas inspeccións de forma periódica nos últimos meses, a última a véspera do accidente mortal.

O sinistro produciuse pouco antes das 17:00 horas do pasado venres nunha mina subterránea situada na parroquia canguesa de Vega de Rengos, no suroccidente asturiano.

O desprendemento afectou a unha superficie de entre seis e oito metros e atrapou os dous mineiros falecidos: Óscar Díaz, de 32 anos e veciño de Cangas del Narcea, e Anilso Soares, de 42 anos e veciño de Villablino (León).

Sánchez, quen apelou á "cautela" á espera de que se vaia avanzando na investigación, convocou "de urxencia" para o vindeiro mércores á Comisión de Seguridade Mineira para analizar as causas do sinistro.