Nubes, chuvias intermitentes e aviso laranxa por marexada este domingo en Galicia
Unha borrasca ao oeste de Irlanda obrigou a activar unha alerta laranxa que se deixará notar especialmente no litoral, con ondas que poderían chegar aos sete metros cara á noite
Praia de Sabón (Arteixo) este domingo
Este domingo predominan os ceos anubrados en Galicia, con chuvieiras intermitentes que diminúen conforme avanza a xornada. A xornada vén marcada polo aviso laranxa en toda a costa galega, con ondas que pola tarde e cara á noite poden alcanzar os sete metros.
Na praia de Sabón, no concello coruñés de Arteixo, xa se intuía como vai empeorar o estado do mar nas vindeiras horas a medida que suba a marea. Aínda que o aviso de risco é para todo o litoral galego, o temporal notarase especialmente na provincia da Coruña, entre a Costa da Morte e Bares.
En puntos como a costa cantábrica, coma Viveiro, ou nas Rías Baixas, a forza do mar tamén se intensificará, aínda que algo menos. Deste xeito, a Dirección Xeral de Emerxencias aconsella manterse lonxe da costa e extremar as precaucións.
A intensidade do vento tamén se incrementará e poderá alcanzar forza cinco, mentres que as temperaturas mínimas experimentarán un ascenso notable e as máximas non terán cambios significativos. Para o luns o mal estado do mar continuará ata o mediodía.
O vento soprará de compoñente suroeste.
