Puente atribúe a un ciberataque o caos rexistrado en Cataluña pola caída de Rodalies

Un cibertataque no centro de control centralizado de Adif podería estar detrás da caída do servizo ferroviario de Rodalies e Media Distancia de Cataluña, segundo apunta o ministro de Transportes.

Óscar Puente afirma que se están analizando as causas da caída deste servizo e apunta que unha das hipóteses que se investiga é a da sabotaxe, xa que as dúas caídas deste luns producíronse "en pouco tempo". O ministro confía en que o servizo quede restablecido ao cen por cento antes do mércores.

Dous cortes en menos dunha hora

O servizo de Rodalies e Media Distancia de Cataluña volveu sufrir unha xornada caótica por mor das incidencias que afectan esta mañá o centro de control centralizado de Adif, que repercuten en continuas suspensións da circulación de trens.

Ata en dúas ocasións tivo que suspenderse o servizo en apenas unha hora. A primeira incidencia rexistrouse ás 06:42 da mañá tras produciuse un problema no centro de control centralizado da estación de Francia, en Barcelona. Ás 07:05 recuperábase a actividade, pero ás 07:24 Rodalies comunicaba que a circulación ferroviaria volvía estar interrompida.

Esta segunda incidencia resolveuse ás 7:44 deste luns e provocou o desconcerto entre os usuarios tras unha fin de semana caótica.

En declaracións a Catalunya Ràdio, o director de comunicación de Adif, Salvador Almenar, asegurou que a incidencia que se foi repetindo durante a mañá é un fallo informático no sistema de comunicación do centro de regulación ferroviario na estación de França.

Almenar subliñou que se tivo que suspender en varias ocasións o reinicio do servizo de tren por cuestións de seguridade e apuntou que se abriu unha investigación para esclarecer as causas da incidencia.

"Non descartamos ningunha opción. Non sabemos que pasou", asegurou.

Interrompida a circulación da R2 Sud de Rodalies pola vía 1 entre El Garraf e Sitges

A circulación da R2 Sud quedou interrompida este luns sobre as 15.30 horas pola vía 1 entre El  Garraf e Sitges (Barcelona) por unha incidencia na infraestrutura, informaron fontes de Renfe a Europa Press.

Nunha mensaxe de 'X', recollido por Europa Press, Adif explica que, por mor desta interrupción, os trens da liña R2 Sud do núcleo de Rodalies de Catalunya e trens de media distancia Barcelona-Tarragona/Reus están a rexistrar atrasos.

Tamén permanece suspendida a circulación da R11 entre Caldes de Malavella (Xirona) e Xirona; a R8 en Rubí-Can Vallhonrat (Barcelona); e as liñas R14, R15 e R16 entre Reus (Tarragona) e Tarragona.