Neste Día Internacional das Persoas Maiores queren demostrar que facer anos non supón limitacións

"Son Mercedes, teño 81 anos e en novembro fago 82. E aos 79 collín un mozo de 92 anos. Sigo con el e son moi feliz".

Mercedes di estar vivindo unha segunda xuventude. Ela demostra que cumprir anos non frea nin pon límites. E diso tamén dá conta Sagrario.

"Teño 94 anos. Pinteime sempre. Os beizos, agora, de maior. Antes, cando era nova, pintaba os ollos. E agora de vella tamén me gusta. Pero tamén os que nos ven, tamén lles agrada ver unha persoa amañada".

Porque a imaxe dunha vellez pasiva está cambiando.

 "Con ilusión, con ganas de seguir adiante, superándome en todo"; "Os anos suman experiencias".

Todas coinciden cos expertos en que a actividade física, a vida social e as novas aprendizaxes son as claves para unha vellez saudable.

"É preciso que teñan espazos onde poidan participar, onde se lles dea voz. E tamén onde poidan ensinar e aprender", explica Vanesa Castro Canosa, directora dunha residencia de maiores.

Neste Día Internacional das Persoas Maiores, Afundación celebrou unha acción colectiva contra o idadismo para concienciar de que os nosos maiores son unha fonte de sabedoría e enerxía.