Morren doce persoas ao envorcar un autobús escolar en Colombia
Regresaban dunha excursión para celebrar a súa graduación
Un dos feridos no hospital. REUTERS
Polo menos doce persoas morreron e vinte quedaron feridas no accidente dun autobús que caeu a un abismo nunha estrada do departamento colombiano de Antioquia (noroeste) cun grupo de estudantes que regresaban dunha excursión.
O autobús partira da localidade turística de Tolú, no departamento caribeño de Sucre, e o accidente ocorreu no sector El Chispero, do municipio de Remedios, sinalou o gobernador do departamento, Andrés Julián Rendón.
"Amencemos coa noticia do accidente dun bus escolar, que conducía de Tolú cara a Medellín. Caeu a un abismo na vía Belén, sector El Chispero, entre Remedios e Zaragoza. Os seus ocupantes: rapaces estudantes do Liceo Antioqueño, de Bello (municipio da área metropolitana de Medellín), que viñan dunha excursión", manifestou o gobernador na súa conta de X.
Rendón expresou as súas "sentidas condolencias ás familias" das vítimas, que regresaban de celebrar a súa graduación.
A Axencia Nacional de Seguridade Viaria asegurou nun comunicado que as autoridades competentes tentan "determinar as causas do sinistro".
