Morre unha persoa tras caer ao mar co seu vehículo no porto de Vilanova de Arousa
O sinistro produciuse pouco antes das oito da mañá, e pasadas as nove os mergulladores recuperaron o corpo do condutor falecido
Un condutor faleceu este luns tras caer ao mar no porto de Vilanova de Arousa, segundo confirmou o 112 Galicia. En concreto, o persoal de Gardacostas contactou arredor das 09:15 horas coa Central de Emerxencias para informar de que os mergulladores desprazados atoparan o corpo do falecido.
Ata o lugar do accidente desprazárase persoal de Salvamento Marítimo, Servizo de Gardacostas de Galicia, Urxencias Sanitarias de Galicia-061, Bombeiros de Vilagarcía, Garda Civil, Policía Local e efectivos da Agrupación de Voluntarios de Protección Civil.
Fora ao redor das 08:00 horas deste luns cando axentes da Garda Civil informaran o 112 de que un coche, cunha persoa no seu interior, estaba na auga.
.jpg)
