Morre unha moza de 25 anos nun accidente de tráfico en Ourense
O coche que conducía foise da vía e envorcou
Unha moza de 25 anos morreu nun accidente de tráfico ocorrido esta madrugada na estrada N-525 ao seu paso polo concello de Ourense, na saída da Valenzá. Por causas que se están a investigar, o coche que conducía saíu da vía.
Na súa traxectoria bateu contra o noiro da propia vía e, tras chocar contra un farol, acabou envorcando. O golpe foi tan violento que a muller saíu despedida do vehículo e cando chegaron os servizos de emerxencias xa só puideron certificar a súa morte.
Os primeiros indicios apuntan a que a condutora non levaba posto o cinto de seguridade. Con este sinistro e o acontecido este sábado en Cerceda, xa son dous os mozos falecidos en accidente nas vías galegas no que vai de fin de semana.
