Morre un traballador ao caerlle un palé enriba nunha nave de Boqueixón

Un traballador de 50 anos faleceu tras quedar atrapado esta mañá por un palé nunha nave situada na parroquia de Lestedo, no concello coruñés de Boqueixón.

Segundo informou o 112 Galicia, profesionais do servizo de Urxencias Sanitarias chamaron ao servizo de emerxencias sobre as 11.00 horas deste venres para informar do suceso.

Ata o lugar de Ramil trasladouse unha ambulancia para atender un operario que quedou atrapado por un palé. Despois diso, o persoal do Centro Integrado de Atención ás Emerxencias de Galicia comunicou o sucedido aos Bombeiros de Ordes, aínda que finalmente se descartou a súa intervención porque o traballador xa falecera.