Morre un motorista tras ser alcanzado por un coche en Paderne
Os primeiros indicios da investigación apuntan a que o coche invadiu o carril contrario
As curvas que inzan a estrada entre Betanzos e Vilalba conforman un tramo especialmente delicado ao seu paso polo concello coruñés de Paderne. Foi aí precisamente, á altura da parroquia de Obre, onde se producía pouco despois das cinco da mañá o accidente mortal. Un turismo chocaba cunha motocicleta e o piloto desta última falecía practicamente no acto.
As primeiras investigacións da Garda Civil de Tráfico apuntan a que foi o coche, en que ía unha soa persoa, o que supostamente invadía o carril contrario e batía frontalmente contra o scooter.
"Encontramos un accidente entre un turismo e unha motocicleta no que, a priori, o turismo invadiu o sentido contrario e colidiu frontalmente contra a motocicleta, co resultado do condutor da motocicleta falecido", manifesta Antonio Velasco, capitán adxunto da Garda Civil de Tráfico do destacamento da Coruña.
O motorista que morreu é un veciño da localidade coruñesa de Paderne de 54 anos, moi coñecido na zona. Aínda que os servizos médicos trataron de reanimalo, non puideron evitar a súa morte.
O condutor do turismo tivo que ser atendido tamén dunha crise nerviosa. A Garda Civil de Tráfico está a investigar agora as circunstancias do accidente, xa que na zona hai numerosas limitacións de velocidade a cincuenta quilómetros por hora que, segundo a veciñanza, moitos condutores non respectan. Os bombeiros de Betanzos encargáronse de retirar os restos da calzada, que permaneceu pechada nun dos seus carrís durante preto de tres horas.
