Trump entra na guerra contra Irán cun ataque masivo ao seu programa nuclear

Os Estados Unidos entraron na madrugada deste domingo de xeito abrupto na guerra de Israel contra Irán co bombardeo das tres principais instalacións do programa nuclear iraniano.

Nunha breve mensaxe á nación dende a Casa Branca, Donald Trump sorprendeu o mundo ao anunciar que as Forzas Armadas acababan de completar un "exitoso ataque" contra as tres instalacións nucleares principais de Irán: Fordow, Natanz e Isfahán.

"Unha carga completa de bombas foron lanzadas no lugar principal, Fordow", dixo na rede social Truth ás 19:50 hora local.

Pouco despois, fontes de Defensa revelaron que neste punto, varios bombardeiros B-2 lanzaran bombas antibúnker GBU-57, de 13.000 quilos cada unha, nunca antes usadas nun combate real. Esa planta nuclear está baixo unha montaña, a uns 90 metros de profundidade.

As outras dúas instalacións -Natanz e Isfaham- foron atacadas cunha trintena de mísiles Tomahawk lanzados dende submarinos situados a máis de 600 quilómetros de distancia.

Completamente destruídas

Unha vez que os avións estadounidenses saíron do espazo aéreo iraniano, Trump anunciaba xa na súa rede social o éxito da operación.

pic.twitter.com/wu9mMkxtUg

— Donald J. Trump (@realDonaldTrump) June 21, 2025

O mandatario confirmou que as plantas de enriquecemento de uranio do país persa quedaran completamente destruídas.

"O noso obxectivo era a destrución da capacidade de enriquecemento nuclear de Irán e deter a ameaza que supoñía para o mundo o principal estado patrocinador do terrorismo. Esta noite pode informar o mundo de que os ataques foron un éxito militar espectacular. As instalacións principais de enriquecemento nuclear de Irán foron completa e totalmente destruídas", asegurou Trump.

Ademais, ameazou o réxime de Teherán con máis ataques se "a paz non chega rápido".

"Irán, o matón de Oriente Medio, agora debe declarar a paz. Se non o fai, os ataques futuros serán moito máis grandes e máis fáciles", advertiu  en ton desafiante e acompañado polo seu vicepresidente, J. D. Vance, polo secretario de Defensa, Pete Hegseth, e polo secretario de Estado, Marco Rubio.

Paz ou traxedia

Trump dixo que agora o réxime iraniano debe elixir entre "a paz ou unha traxedia máis grande que a que viron nos últimos oito días" e engadiu que hai outros moitos obxectivos en Irán que poderían atacar se o deciden.

"Se a paz non chega rápido, iremos tras esoutros obxectivos con precisión, rapidez e habilidade", ameazou o mandatario.

O republicano asegurou que en todo este tempo estivo traballando co primeiro ministro israelí, Benjamin Netanyahu, en equipo "como quizais non se viu antes".

Segundo fontes da Casa Branca consultadas por EFE, os Estados Unidos alertaron previamente a Israel dos ataques desta noite e logo Trump falou por teléfono con Netanyahu.

"Quero darlle as grazas ao Exército israelí polo marabilloso traballo que fixeron e, o que é máis importante, quero agradecer aos grandes patriotas estadounidense que pilotaron esas magníficas máquinas (os cazas) esta noite", engadiu este domingo.

O mandatario hebreo felicitou o presidente estadounidense pola súa "audaz decisión" que, considera, cambiará a historia.

"O presidente Trump actuou contra o máis perigoso dos réximes do mundo e contra as armas máis perigosas".

Nunha publicación na súa conta de X, acompañada dunhas declaracións en vídeo, insiste na idea de que "a paz se logra coa forza".

"Primeiro vén a forza, logo a paz (...) E esta noite, @realDonaldTrump e os Estados Unidos actuaron con moita forza".

"Violación imperdoable do dereito internacional"

O ministro de Exteriores de Irán, Abás Araqchí, considerou que os EUA "traizoaron a diplomacia" e cruzou "todas as liñas vermellas" con este ataque que supón unha "violación imperdoable do dereito internacional" e que "debe condenarse".

"Vou viaxar a Moscova esta tarde e teño unha reunión con Putin mañá pola mañá. Rusia é un amigo de Irán, temos unha alianza estratéxica e sempre nos consultamos mutuamente. Tamén nos últimos tres ou catro meses, cando negociabamos cos Estados Unidos, sempre informamos aos nosos amigos rusos sobre o progreso, ou a falta de progreso", dixo nunha comparecencia en Istambul, onde participa no 51 cume da Organización para a Cooperación Islámica.

Segundo dixo, "a porta da diplomacia sempre debería estar aberta", pero que "isto non é o caso agora".

"O meu país foi agredido e debemos responder no noso lexítimo dereito de defensa propia e faremos isto durante o tempo que faga falta", agregou.

Lembrou que Irán "estaba no medio da diplomacia cando Israel a dinamitou" e "no medio de negociacións cos europeos en Xenebra, hai só dous días, cando os Estados Unidos decidiron dinamitalas".

Condena de Rusia

Rusia condena os ataques estadounidenses que considera "irresponsables" e esixe "o fin da agresión", segundo comunicou este domingo o Ministerio de Asuntos Exteriores.

"A irresponsable decisión de someter o territorio dun Estado soberano a ataques con mísiles e bombas, independentemente dos argumentos utilizados, viola gravemente o dereito internacional, a Carta das Nacións Unidas e as resolucións do Consello de Seguridade da ONU que cualifican tales accións de inaceptables", reza a nota na canle de Telegram do Ministerio.

Preocupación na ONU

Tras os bombardeos, o secretario xeral da ONU, António Guterres, dixo sentirse "gravemente alarmado polo uso da forza dos Estados Unidos contra Irán hoxe", e advertiu de que "non hai solución militar" que substitúa á diplomacia.

"Esta perigosa escalada nunha rexión que xa está no fío é unha ameaza directa á paz internacional e a seguridade", dixo Guterres nun comunicado urxente.

"Nesta hora tan perigosa, é crítico que evitemos a espiral do caos", subliña Guterres, quen lembra o "risco crecente de que o este conflito rapidamente se vaia das mans, con consecuencias catastróficas para os civís, a rexión e o mundo".

Reacción da Unión Europea

A presidenta da Comisión Europea, Ursula von der Leyen, dixo que Irán debe comprometerse "a unha solución diplomática crible" e "a mesa de negociacións é o único lugar para poñer fin a esta crise", segundo apuntou en redes sociais.

Engadiu que "Irán nunca debe adquirir a bomba" (nuclear) e que "coas tensións en Oriente Medio nun novo punto álxido, a estabilidade debe ser a prioridade. E o respecto do Dereito Internacional é fundamental".

Á súa vez, a alta representante da Unión Europea para Asuntos Exteriores, Kaja Kallas, pediu "a todas as partes" dar "un paso atrás" para evitar unha nova escalada bélica en Oriente Próximo.

Entre os países da UE, o chanceler alemán, Friedrich Merz, instou a Irán establecer inmediatamente negociacións con EE.UU. e Israel para atopar unha solución diplomática, informou o Goberno xermano.

O ministro francés de Asuntos Exteriores, Jean-Noël Barrot, exhortou a actuar con "contención" para evitar "calquera escalada que poida conducir a unha ampliación do conflito" e reafirmou a vontade de contribuír cos seus socios a unha "solución negociada".

Italia, que xustificou o ataque estadounidense debido ao "perigo" da produción nuclear iraniana, pediu tamén ás partes unha desescalada.

"Que Irán sente nunha mesa de negociacións", reclamou o ministro de Exteriores, Antonio Tajani.

O Goberno de España expresou a máxima preocupación: "É urxente o cesamento da violencia e a volta ás negociacións", segundo un comunicado do Ministerio de Asuntos Exteriores, que tamén reclamou contención e respectar o Dereito internacional.

Á marxe da UE, o primeiro ministro do Reino Unido, Keir Starmer, dixo que os EUA tomaron medidas" para "mitigar" a ameaza nuclear de Irán.

"Instamos a Irán regresar á mesa de negociacións (con Estados Unidos) e alcanzar unha solución diplomática", concluíu.

Oriente Próximo

Varios países árabes (Iraq, Arabia Saudita, o Líbano, Omán e Catar) condenaron unanimemente o ataque, unha "grave ameaza" para a seguridade de Oriente Medio, e defenderon conter a situación en canles diplomáticas tras rexeitar as solucións militares.

A organización islamita palestina Hamas considera que os bombardeos son unha "flagrante violación" do Dereito Internacional, de "escalada perigosa" e "unha ameaza directa á paz e a seguridade internacionais".

O goberno dos rebeldes hutís iemenís en Saná amosou o seu "pleno apoio" a Irán e o compromiso das súas forzas armadas, "listas para atacar barcos e buques de guerra estadounidenses no mar Vermello".