Zelenski irá a Budapest se é convidado, pero rexeita a Orbán como mediador

O presidente ucraíno Volodimir Zelenski está disposto a acudir a Budapest, se é convidado, para manter contactos en calquera formato cos presidentes de Rusia e dos EUA, Vladimir Putin e Donald Trump, pero rexeita que o primeiro ministro húngaro Víktor Orbán poida exercer de mediador debido á súa excesiva proximidade a Rusia e á hostilidade que mostrou con Kíiv.

“Dixemos en público e en privado que estamos listos para reunirnos en calquera formato que funcione”, dixo Zelenski, pero matiza que a capital húngara non é o mellor lugar para estes contactos. Avoga porque as conversas para poñer fin á guerra teñan lugar en países como Suíza, Austria, o Vaticano, Arabia Saudita, Qatar ou Turquía.

Zelenski non cre que un líder como Orbán, que está a vetar que se avance nas negociacións de adhesión á UE de Ucraína e se opón ás sancións a Rusia, poida facer algo positivo para os ucraínos ou algo equilibrado.

O presidente ucraíno explica que Trump busca coa súa reunión con Putin en Budapest avanzar cara á paz e apunta que o seu país celebrará calquera resultado positivo que se produza neste sentido.