Falece o exvicepresidente do Goberno Pedro Solbes aos 80 anos

O exvicepresidente do Goberno e ministro de Economía e Facenda, Pedro Solbes, faleceu este sábado aos 80 anos segundo confirmaron fontes da dirección do PSOE.

Solbes foi secretario de Estado da Unión Europea nos tempos da adhesión de España á UE e, despois, ministro de Agricultura e de Economía nos gobernos de Felipe González.

Repetiu como ministro de Economía e vicepresidente do Goberno con José Luis Rodríguez Zapatero e foi comisario europeo de Asuntos Económicos e Monetarios. 

Nun comunicado, o PSOE lamentou o falecemento de Pedro Solbes, agradeceu o "traballo", o "compromiso" e a "vocación de servizo público a España e ao proxecto europeo" do exministro e puxo en valor a súa "exemplar traxectoria ao servizo de España e das súas institucións".

"Grazas, compañeiro Pedro. Polo teu traballo, polo teu compromiso e a túa vocación de servizo público a España e Europa. Grazas por contribuír a mellorar a vida de todos e de todas. Ata sempre, Pedro, e grazas".

O pasamento de Solbes transcendeu no medio da reunión do Comité Federal do PSOE, reunido en Madrid. Os socialistas transmitiron o seu "agarimo e aprecio á súa familia e aos seus seres queridos" e destacaron "a súa traxectoria exemplar ao servizo de España e das súas institucións".

Polo tanatorio pasaron este sábado moitas persoas que lle quixeron trasladar as súas condolencias á familia. Pedro Sánchez, José Luis Rodríguez Zapatero e Nadia Calviño son so algúns exemplos dos moitos dirixentes do PSOE que se achegaron e gabaron a figura de Solbes.