Feijóo entende o temor de Aznar a que Sánchez poida alterar o resultado das eleccións

Mentres o presidente do Goberno participaba nun acto polos vinte anos da aprobación do matrimonio igualitario, no Supremo declaraba quen foi a súa man dereita, José Luis Ábalos, e o seu asesor Koldo García. Sánchez non fixo mención no seu discurso, pero si outros socialistas.

Diana Morant, secretaria xeral do PSPV e ministra de Ciencia, asegurou non ter "ningunha confianza no seu testemuño" e pediu "que a xustiza faga o seu traballo e que todo o peso da lei caia sobre estes desvergonzados".

Polo momento, Sumar tamén se apunta á teoría de que son tres casos illados. "Se iso se convertese nun esquema de financiamento ilegal do PSOE, estariamos nunha etapa moi distinta", dixo o voceiro do partido en conferencia de prensa. Pero, segundo Ernest Urtasun, "nestes momentos, o que temos son responsables moi importantes do PSOE con casos de corrupción moi graves".

Podemos cre que se trata dunha estratexia da coalición para "facer ver que este é un caso de tres golfos, tres puteiros, tres impresentables" cando, segundo o seu voceiro Pablo Fernández, "este é o caso PSOE".

Os socios parlamentarios piden medidas urxentes. "Tolerancia cero coa corrupción", reclama Ana Pontón, portavoz nacional do BNG , quen considera, ademais, que Pedro Sánchez "xa está tardando" en comparecer no Congreso.

Pola súa parte, o líder do PP apoia as declaracións de José María Aznar, que ve a Pedro Sánchez capaz de manipular os resultados das eleccións.
"Non teño dúbidas sobre os funcionarios de Correos, pero o sistema ten algunhas lagoas que poden ser usadas de xeito torticeiro, que o sistema non está totalmente blindado", dixo Alberto Núñez Feijóo nunha entrevista en esRadio.

En todo caso, como di o presidente manchego, Emiliano García-Page, "hoxe as declaracións que importan son as doutros, (...) acabarase sabendo todo".