España logra un acordo coa OTAN que a exime de gastar o 5 % do PIB en defensa
España gastará o 2,1 % do seu PIB en defensa, "nin máis nin menos", tras lograr un acordo coa OTAN que a exime de chegar ao 5 %: "É desproporcionado, innecesario e incompatible co estado do benestar"
Os 32 países membros da OTAN acordan gastar o 5 % do PIB en 2035, con flexibilidade para España para gastar menos
Feijóo ve o anuncio de Sánchez de non gastar máis en defensa como unha cortina de fume
O Goberno español logrou un acordo coa OTAN que o exime de comprometerse a gastar o 5 % do PIB en defensa e cuxos detalles explicou este domingo o xefe do executivo, Pedro Sánchez, nunha declaración institucional no pazo da Moncloa.
Pedro Sánchez, garantiu este domingo que España gastará o 2,1 % do seu PIB en defensa, "nin máis nin menos", tras lograr un acordo coa OTAN que a exime de chegar ao 5 %, que considera que era desproporcionado, innecesario e incompatible co estado do benestar.
Sánchez fixo unha declaración institucional no pazo da Moncloa tras ese acordo ao que chegou coa Alianza Atlántica logo de negociar desde o venres pasado, cando transmitiu ao secretario xeral da OTAN Mark Rutte a súa negativa a chegar a esa porcentaxe.
Un intercambio de cartas con Rutte foi o colofón desa negociación que permitirá a España non gastar máis do xa previsto en defensa pero cumprir con todas as súas capacidades e compromisos coa Alianza e manter a unidade desta organización.
É o que asegurou o xefe do Goberno, que recalcou que España pasou dun 0,9 % do PIB en gasto en defensa en 2018 ao 2 % neste 2025, e iso permítelle ser un actor clave da arquitectura de seguridade da UE, da OTAN e da ONU.
Sanchez explica que na OTAN haberá unha asimetría pola que non todos os aliados gastarán a mesma porcentaxe. España dedicará o 2,1 %
Sánchez expresou o seu respecto aos países que queiran aumentar o seu gasto militar e explicou que haberá unha asimetría na OTAN pola que non todos os aliados gastarán a mesma porcentaxe.
No caso de España, segundo os técnicos das Forzas Armadas, España necesitará dedicar un 2,1 % do seu PIB.
"Por tanto, o 2,1 %, nin máis nin menos", subliñou o presidente do Goberno, quen insistiu en que gastar máis sería malgastar e achegarse a un 5 % de forma artificial que non axudaría a alcanzar os obxectivos.
Sánchez afirmou que, co acordo, España permanece dentro do consenso da OTAN. "O pacto conseguiuse mediante unha negociación diplomática discreta, eficaz, honesta e xusta".
"España non vai gastar o 5 % do seu PIB en defensa, pero a súa participación, peso e lexitimidade na OTAN seguen intactas, con todos os deberes, con todos os dereitos que iso implica", engadiu.
O acordo dixo que garante o éxito do cume da OTAN da próxima semana e é bo para España e para a Alianza.
O presidente do Goberno agradeceu tamén a Rutte e ao resto de aliados da OTAN o traballo que se fixo para conseguilo.
O compromiso dos países da OTAN respecto a ese gasto será un dos asuntos clave do cume da Alianza que se celebrará o martes e o mércores desta semana na Haia.
A OTAN acorda gastar o 5 % do PIB en defensa en 2035, con flexibilidade para España
Os países da OTAN acordaron este domingo establecer un obxectivo do 5 % do PIB para o gasto anual en defensa e seguridade para 2035, cunha flexibilidade para España para gastar menos, segundo fontes aliadas.
O acordo conta co visto e prace dos 32 membros da OTAN, segundo as fontes, pero só se oficializará cando sexa aprobado polos líderes, incluído o presidente estadounidense Donald Trump, no seu cumio na Haia o mércores.
"Confirmo pola presente que o acordo no próximo cumio da OTAN outorgará a España a flexibilidade para determinar a súa propia traxectoria soberana para alcanzar o Obxectivo de Capacidade e os recursos anuais necesarios como porcentaxe do PIB e para presentar os seus propios plans anuais", di o secretario xeral da OTAN Mark Rutte nunha carta enviada hoxe ao presidente do Goberno Pedro Sánchez á que tivo acceso a axencia EFE.
"A traxectoria e o equilibrio do gasto, en virtude deste plan, revisaranse en 2029, á luz da contorna estratéxica e dos Obxectivos de Capacidade da OTAN actualizados", continúa Rutte na misiva.
A carta de Rutte responde á enviada por Sánchez o pasado día 19 para comunicarlle a negativa do seu Goberno a aumentar o gasto en Defensa ata o 5 % do PIB.
"Entendo que España está convencida de que pode cumprir os novos Obxectivos de Capacidade acordados cunha traxectoria de gasto inferior ao 5 % (3,5 % en defensa básica, 1,5 % en seguridade relacionada) do PIB", sinala Rutte na súa carta de hoxe.
Ante a aceptación por parte da OTAN desa "flexibilidade" para España, Sánchez confírmalle a Rutte que España aceptará o borrador de declaración final do cumio do próximo mércores.
Sánchez e Rutte nunha imaxe de arquivo. EFE / Kiko Huesca
Sánchez confírmalle a Rutte que España aceptará o borrador de declaración final do cumio do próximo mércores
Noutra carta, con data de hoxe, o presidente do Goberno español comunícalle a Rutte que España aceptará o borrador de declaración final do cumio do mércores. Xustifica a súa decisión de dar o seu acordo á declaración final en aras do espírito de unidade aliada.
"Confirmo que España aceptará o borrador de declaración distribuído o 22 de xuño para o próximo cumio da OTAN, entendendo que o compromiso de España se refire ao cumprimento do Obxectivo de Capacidade a tempo e na súa totalidade, independentemente da proporción do PIB que represente, e a presentar os nosos propios plans anuais en consecuencia", precisa Sánchez.
Finalmente, o presidente do Goberno español garante ao secretario xeral da OTAN que pode contar con España como un aliado comprometido e fiable, e asegura que espera con grande interese o éxito do cumio da Haia.
