O mito do corte de dixestión: a hidrocución provocada por un cambio brusco da temperatura corporal

Na praia aínda a día de hoxe logo de comer hai quen agarda unha, dúas ou máis horas para bañarse no mar. Outros non o fan. Consideran que se trata dun mito. 

"Realmente o que se denomina corte de dixestión ten outro nome. Chámase hidrocución, pero non sucede porque non respectemos o horario no que dura a dixestión da comida, senón que se debe a outros motivos", explica a dietista, nutricionista e farmacéutica Fátima Branco.

A hidrocución vén provocada por unha diferenza brusca da temperatura corporal. E por que se asocia, entón, ás comidas?

"Cando a temperatura do corpo está alta é sobre todo despois de comer unha comida copiosa, e se de repente nos metemos na auga, que está fría, esa diferenza de temperatura é o que provoca o famoso corte de dixestión, que non é tal, senón un fallo circulatorio e tamén respiratorio que fai que a persoa perda a conciencia, e como estamos na auga ese é o risco", detalla a especialista Fátima Branco.

Meterse na auga paulatinamente e ir mollando o corpo aos poucos son as recomendacións dos expertos para evitar consecuencias non desexadas.