Miguel Fernández: “A Reigosa nin a botamos nin lle pedimos marchar”

O alcalde de Lugo, Miguel Fernández, recoñeceu este martes que a edila María Reigosa non lle comunicou a súa intención de deixar o grupo municipal do Partido Socialista para exercer como concelleira non adscrita na corporación municipal, pero, en todo caso, expresou o seu “respecto absoluto” a esa decisión, porque “nin a botamos nin lle pedimos que marchase”, asegurou.

A preguntas dos medios de comunicación, Miguel Fernández afirmou que a marcha de María Reigosa, que deixa en minoría o Goberno bipartito da cidade de Lugo -agora socialistas e nacionalistas suman 12 edís, os mesmos que ten o Partido Popular-, "non vai repercutir en absoluto no funcionamento do Concello".

"Imos seguir traballando, seguir funcionando, con máis ilusión se cabe, porque somos menos, para levar adiante o proxecto de cidade que temos”, sinalou o alcalde e asegurou que non teme a que esta situación entorpeza a acción de goberno.

“Non vai repercutir en absoluto no funcionamento do Concello. Os poucos que somos estamos a traballar con moi bo ritmo, concelleiros, asesores e funcionarios municipais. Creo que os resultados están aí, con anuncios importantes para a cidade", dixo Fernández, quen lembrou que Reigosa "non chegou a ser unha parte activa da xestión diaria", de modo que a súa ausencia "non ten por que repercutir".

De feito, con respecto ao necesario apoio de María Reigosa para aprobar de forma definitiva o orzamento para este ano no pleno deste xoves, Fernández aseverou que non ten "por que ter a máis mínima dúbida ao respecto", tendo en conta de que "os apoiou na aprobación inicial".

"Agora, formuláronse unha serie de alegacións que resolveron os técnicos municipais e non teño ningunha dúbida de que manterá a súa palabra, porque o dixo publicamente", precisou.

En todo caso, o rexedor recoñeceu que "a aritmética do pleno vai cambiar", aínda que confía en sacar adiante os asuntos importantes para a cidade.

En canto á posibilidade de que María Reigosa sumase o seu voto aos do Partido Popular para presentar unha moción de censura, dixo que "cada un sabe o que ten que facer. Non teño que valorar iso".

En canto ás circunstancias que motivaron a decisión de María Reigosa, Fernández sinalou que “entrar no medio dun mandato, moi avanzado xa, e nun grupo novo, sen experiencia de xestión nunha administración como a local, causa desaxustes. É complicado. Se ademais, por razóns laborais ou as que fosen, non tiña dedicación exclusiva, as cousas complícanse".

"Máis nada que dicir, respecto absoluto á decisión que tomou. Será unha concelleira non adscrita con todos os seus dereitos, como calquera dos outros 25 edís”, concluíu.

Así mesmo, precisou que este asunto non foi abordado coa dirección galega e provincial do partido, porque "ela deuse de baixa, non é militante".