Montero despídese dos seus compañeiros na Moncloa ante as eleccións andaluzas

A vicepresidenta primeira do Goberno e ministra de Facenda, María Jesús Montero, despediuse este martes dos seus compañeiros de gabinete na que foi a súa última reunión do Consello de Ministros, xa que deixará o Executivo nos próximos días para encabezar a candidatura do PSOE nas eleccións andaluzas do 17 de maio.

Non hai data para a súa saída do Goberno, pero a súa despedida revela que será antes do próximo martes 31 de marzo, cando volverá reunirse na Moncloa o Consello de Ministros.

A decisión do presidente andaluz, Juanma Moreno, de convocar as eleccións para o 17 de maio adiantou a saída de Montero, e obriga o presidente do Goberno, Pedro Sánchez, a buscar un substituto, coa dúbida de se a remodelación do gabinete se limitará a ese cambio ou haberá máis.

A ministra voceira, Elma Saiz, explicou que foi un Consello de Ministros "emotivo" e eloxiou a Montero por ser un "referente".

Tamén asegurou na conferencia de prensa posterior á reunión que os membros do gabinete a botarán de menos e destacou o seu traballo en favor das comunidades autónomas, especialmente na xestión dos fondos europeos destinados ás autonomías.

Pola súa banda, o titular de Economía, Carlos Cuerpo, encomiou tamén a vicepresidenta primeira, cuxo "enorme labor" no Goberno puxo de relevo, e coincidiu en que no Goberno botarana de menos "tanto no ámbito persoal como no profesional".

Respecto á posibilididade de que sexa el quen substitúa a Montero na carteira de Facenda, lembrou que esta decisión só compete ao presidente do Goberno, Pedro Sánchez, aínda que engadiu que o feito de que el figure nas quinielas interprétao como proba de que a área económica do Executivo "está a realizar un bo traballo". 

Non o ve así Sumar, porque os choques con Yolanda Díaz son habituais. Din que o Ministerio de Economía bloquea sistematicamente as medidas de Traballo; a última, o control do rexistro horario.

"Antes chamábase Nadia Calviño e agora Carlos Cuerpo (...) é vergoñento, pero xa estamos acostumadas", explicou en conferencia de prensa Verónica Barbero, voceira de Sumar no Congreso, visiblemente enfadada. 

Para o PP vaise a peor ministra de Facenda da democracia. "As súas mans están queimadas por Santos Cerdán e dous ex altos cargos do seu ministerio que están no banco", asegurou Ester Muñoz, voceira do PP no Congreso. Acúsana de incumprir a Constitución por non presentar uns Presupostos Xerais en toda a lexislatura.