A OMS declara a emerxencia internacional por un gromo de ébola no Congo e Uganda

A Organización Mundial da Saúde (OMS) emitiu unha declaración de "emerxencia de saúde pública de importancia internacional" polo novo gromo de ébola causado polo virus Bundibugyo que afecta á República Democrática do Congo e Uganda.

A declaración, inclúe un anuncio de "emerxencia pandemica", aínda que se recalca que o gromo aínda "non cumpre os criterios de emerxencia pandémica", tal e como se definen no Regulamento Sanitario Internacional (RSI) de 2005.

Entre as condicións que levaron ao organismo internacional a cualificar de emerxencia están os oito casos de contaxio confirmados este venres por laboratorios, 336 casos sospeitosos e 88 presuntas mortes na provincia de Ituri, na República Democrática do Congo.

Adicionalmente, dous laboratorios confirmaron casos, incluíndo un falecido, sen vinculación aparente entre eles nun lapso de 24 horas en Kampala, Uganda, entre o venres e sábado.

Estes eventos constitúen unha preocupación maior debido á posibilidade de "propagación internacional da enfermidade", da cal xa se documentaron dous casos confirmados en Uganda de persoas que viaxaron desde a República Democrática do Congo.

Os Centros para o Control e Prevención de Enfermidades de África mostraron a súa preocupación pola posibilidade de trasmisión debido á intensa mobilidade poboacional e convocaron a unha reunión urxente de coordinación de alto nivel con entidades rexionais e internacionais, como a OMS e os CDC de EE.UU., China e Europa.

Na declaración, a entidade sanitaria afirma que se "require coordinación e cooperación a nivel internacional para comprender o alcance do gromo, coordinar as medidas de vixilancia, prevención e resposta, ampliar e reforzar as operacións e garantir a capacidade para aplicar medidas de control".

No mesmo documento a OMS recomendou "activar os seus mecanismos nacionais de xestión de desastres e emerxencias e establecer un centro de operacións de emerxencia e implicar á comunidade —a través dos líderes locais, relixiosos e tradicionais, así como dos curandeiros— de modo que axuden na identificación de casos, o rastreo de contactos e a educación sobre os riscos".

O último gromo na RDC foi a finais de 2025 na provincia de Kasai (centro). Tratouse do décimo sexto no país desde o descubrimento do virus en 1976.

Segundo a OMS, o ébola presenta unha taxa de mortalidade de entre o 60% e o 80%, transmítese por fluídos corporais e causa febres altas, debilidade intensa e hemorraxias graves.