Mercado de doces de convento na hospedería de San Martiño Pinario

A visita á despensa da hospedería de San Martiño Pinario xa constitúe unha experiencia en si mesma pola súa localización e singularidade arquitectónica. Pero nestas datas ten un aliciente para os máis larpeiros: o mercado de doces de convento. Unha oportunidade única de poder acceder a ducias de especialidades de repostería elaboradas seguindo receitas ancestrais e de xeito artesanal por relixiosas de 35 conventos de toda España.

Dificil elixir entre as 200 referencias de turróns, xemas, polvoróns ou mazapáns. Pero hai sabores que xa teñen adeptos, como os panetones das Clarisas de San Xosé de Vilar de Astrés de Ourense, que se agotan cada ano, ou as atrevidas mesturas dos míticos torresmos de Soria con doces típicos de Nadal.

Hai clientes fieis e outros que veñen experimentar coa idea tamén de axudar á superviviencia das congregacións relixiosas. Durante todo o ano teñen á venda ademais licores, aceites, marmeladas ou especias elaboradas nos conventos.

Nos próximos días habilitarán a venda en liña de todos os produtos, pero acudir á tenda terá ademais o aliciente de poder visitar o belén que estará aberto ao público dentro duns días.