Medio Rural alerta da inestabilidade polos aranceis da China aos lácteos e pide negociación á UE e ao Estado
Medio Rural alerta da inestabilidade polos aranceis da China aos lácteos e pide negociación á UE e ao Estado
Os gravames poden chegar ao 42,7 % e xeran incerteza no conxunto do sector produtor
A conselleira do Medio Rural, María José Gómez, advertiu da inestabilidade e da incerteza que provocan os aranceis de ata o 42,7 % impostos pola China a produtos lácteos da Unión Europea.
Por este motivo, reclamou ao Goberno central e á UE que abran unha vía de negociación para reducir o impacto destas medidas comerciais.
A conselleira indicou que, no caso de España, o efecto directo pode ser menor que noutros países, pero subliñou que terá consecuencias a nivel global.
Lembrou que Galicia é a novena rexión produtora de leite de Europa e concentra arredor do 42 % da produción estatal.
Engadiu que a Unión Europea é un mercado relevante para A China e que calquera cambio arancelario afecta de forma directa á estabilidade do sector.
Segundo explicou, mantivo contactos con empresas que previsiblemente serán das máis afectadas, aínda que polo momento non detectan unha preocupación inmediata.
Avanzou que están previstas novas reunións para avaliar a evolución da situación.
Constitución do Observatorio do Sector Lácteo de Galicia
A conselleira participou este martes na constitución do Observatorio do Sector Lácteo de Galicia, un órgano colexiado de seguimento, asesoramento, consulta e análise deste ámbito.
A reunión celebrouse tras a entrada en vigor do decreto que actualiza a regulación do Observatorio, co obxectivo de realizar un seguimento continuado do sector e mellorar o seu funcionamento.
O órgano foi creado en 2007, pero a Xunta considera necesario adaptalo aos cambios rexistrados na produción, na industria, no consumo e nos mercados nacionais e internacionais.
A reforma modifica a composición para integrar todos os elos da cadea de valor do leite: produción, industria, distribución e consumo.
O Observatorio conta con 21 vogais e incorpora unha organización de produtores lácteos de Galicia con maior representatividade.
O novo decreto tamén permite crear grupos de traballo con persoas expertas externas e inclúe o estudo da cadea de valor e das relacións comerciais e contractuais.
Críticas do Sindicato Labrego Galego
Na reunión avaliouse a situación actual do sector e as perspectivas de evolución futura en Galicia, no Estado e no ámbito internacional.
Ademais, avanzouse na proposta dun novo agrupamento de tramos de produción, para o que se creou un grupo de traballo específico.
O Sindicato Labrego Galego criticou que o Observatorio carece de información relevante e actualizada.
A organización considera que non hai transparencia nin datos reais sobre os custos de produción que permitan tomar decisións fundamentadas.
