Mario Soriano: "As Palmas é un dos mellores equipos da categoría"
O equipo canario avantaxa en catro puntos ao Dépor, que só sumou un punto dos últimos doce posibles
Mario Soriano, atacante do Deportivo, apuntou este xoves que o seu equipo necesitará “minimizar os erros” para reencontrarse coa vitoria ante As Palmas, un dos “mellores” equipos da liga.
“Vai ser un partido moi duro porque As Palmas é un dos mellores equipos da categoría. Eles saben moi ben ao que xogan e fano moi ben porque teñen xogadores moi bos. Temos que levar o partido onde queremos e minimizar os erros para poder levarnos os tres puntos neste partido”, manifestou en rolda de prensa.
O equipo insular asaltou a segunda praza de ascenso directo tras encadear catro xornadas sen perder. Avantaxa en catro puntos ao Dépor, que só sumou un punto dos últimos doce posibles.
“O outro día -contra o Cádiz- era un partido para gañar, pero ao final escapou en dúas accións que son moi evitables. Falamos de que o primeiro gol é un balón parado no que podemos estar todos máis atentos. E o segundo é unha transición na que está todo o equipo moi arriba”, analizou.
Neste sentido, Mario Soriano, un dos habituais no once branco e azul, sinalou que o seu equipo ten que aprender a facer “faltiñas” para cortar as transicións do rival.
“O equipo o outro día estivo ben, tivemos as nosas ocasións e debemos pechar o partido antes. Creo que mostramos outra cara respecto aos últimos partidos de decembro”.
