Maribel Vilaplana, a xornalista que comeu con Mazón o 29-O, citada como testemuña na causa da dina

A sección segunda da Audiencia Provincial de Valencia ordenou que declare como testemuña na causa da dina, que se instrúe na praza número 3 do Tribunal de Instancia de Catarroja, a xornalista Maribel Vilaplana, que comeu co presidente da Generalitat, Carlos Mazón, nun restaurante o 29 de outubro de 2024.

Desta forma, a Audiencia estimou parcialmente nun auto o recurso de apelación interposto por unha acusación particular e revogaron a decisión adoptada pola xuíza instrutora nun auto ditado o pasado 12 maio e que ela mesma confirmou o 16 de xuño, ao desestimar un recurso de reforma.

A Sala tivo en conta para resolver o recurso a carta difundida, con posterioridade ao ditado da resolución recorrida, pola propia xornalista a través dos medios de comunicación, e que foi unida ao procedemento mediante un auto de data 11 de setembro de 2025, no que a instrutora volveu denegar a testifical.

A Audiencia conclúe que descartar a posibilidade de que a comunicadora, "en sede xudicial, coas esixencias e características propias dunha dilixencia procesual, puidese ofrecer elementos de interese aos que non fixo referencia na carta que publicou, revélase precipitado".

"Non se pode descartar que, interrogada nas condicións e coas garantías do proceso penal, poida ofrecer detalles ou matices que puidesen resultar de interese para a investigación. O seu testemuño, polo demais, podería ofrecer información que só ela, o presidente da Generalitat e os seus interlocutores poderían coñecer", recolle o auto de apelación

A Sala coincide coa maxistrada instrutora en que o presidente da Generalitat, pola súa condición de aforado, "queda fóra do ámbito subxectivo da investigación que dirixe", pero matiza que iso "non obsta para que deban practicarse dilixencias que resulten pertinentes e de utilidade á investigación".