Ferrol en Común, Sumar, Anova, EU e Podemos irán xuntos en Ferrol nas municipais de 2027
A coalición aínda debe definir a súa candidatura, un proceso que prevén concluír no outono
Os promotores falan dunha alianza "histórica" por agrupar a todas as organizacións "da esquerda transformadora"
"As disputas do pasado pecháronse. Aprendemos dos nosos erros e agora toca mirar o futuro", asegurou o exalcalde Jorge Suárez
Integrantes de Ferrol en Común, EU, Sumar, Anova e Podemos. FEC.
Ferrol en Común, Sumar, Anova, Esquerda Unida e Podemos anunciaron este xoves que presentarán unha candidatura única na cidade departamental para as eleccións locais de 2027.
Así o anunciaron na praza da Alameda do Cantón, onde o portavoz de Ferrol en Común e exalcalde da cidade, Jorge Suárez, celebrou que se trata dunha alianza "histórica" por agrupar a todas as organizacións "da esquerda transformadora".
"Ferrol necesita un cambio político e social", defendeu Jorge Suárez ante os medios, acompañado pola edil local, Nerea P. Carballeira.
O exrexedor subliñou que a mellora socioeconómica que vive a cidade "non se está acompañando de políticas públicas transformadoras" e reivindicou que "a unión de todos os que estamos aquí dará un goberno de esquerdas".
A coalición, que aínda debe definir a súa candidatura, a súa fórmula xurídica e os prazos internos, preséntase como unha "unidade sólida" que pretende abrir un novo capítulo tras os desencontros do pasado.
"As disputas do pasado pecháronse. Aprendemos dos nosos erros e agora toca mirar o futuro", prometeu Suárez, que non descartou encabezar a lista, insistindo en que "o candidato ou candidata debe ser decidido por asembleas" e que agora "toca falar máis de propostas que de persoas".
Obxectivo: gobernar replicando o escenario de 2015
A folla de ruta prevé que durante o outono se conclúa o proceso de elección da candidatura, para iniciar 2027 "con toda a forza pública".
O obxectivo, segundo sinalou Suárez, é "ser a primeira forza de esquerdas dentro dunha maioría de esquerdas" e gobernar, replicando o escenario de 2015, cando Ferrol en Común logrou a alcaldía.
"As maiorías en Ferrol decídense por centenares de votos. O resultado de 2015 non é inviable", aseverou.
Pola súa banda, Nerea P. Carballeira puxo o foco nas políticas sociais, feministas, ecoloxistas e migratorias.
Criticou que, co Partido Popular a cargo do Concello, non se viron "políticas de feminismo ou migración" e puxo como exemplo a falta dunha pancarta contra o racismo aprobada nunha moción.
"As persoas teñen que volver ser escoitadas en necesidades como a vivenda ou a mocidade", reivindicou.
A nova alianza preséntase como "unha alternativa solvente" fronte ao avance da dereita e a #ultradereita e afirma confía en que a marca Ferrol en Común, "reconocible e consolidada tras 11 anos", sexa o paraugas que aglutine o voto do cambio. "Temos a forza para aspirar a todo", concluíu Suárez.
