Sumar Galicia propón formar coalicións a Podemos, Anova, Equo e EU para as municipais
A formación considera que "están chamados a entenderse" de cara a impulsar candidaturas onde aínda non existen, principalmente nas cidades
EU acepta o diálogo e establecer algún tipo de acordo
O secretario xeral de Sumar Galicia, Paulo Carlos López. M. Dylan / Europa Press (Arquivo)
O secretario xeral de Sumar Galicia, Paulo Carlos López, enviou cartas aos líderes de Podemos, Anova, Equo Verde e Esquerda Unida para propoñerlles unha reunión de cara a estudar posibles acordos entre as formacións á esquerda do PSOE para as municipais do 2027.
As misivas enviadas a Martiño Noriega (Anova), Isabel Faraldo (Podemos), Lino Costas (EU) e Néstor Vázquez (Verdes Equo), ás que tivo acceso Europa Press, pretenden trasladarlles a estas formacións a vontade de Sumar de "abrir canto antes un espazo de diálogo político" para explorar posibles acordos para os comicios locais.
O organización, que lidera Paulo Carlos López en Galicia, quere levar á Conferencia Política Nacional que celebrará o 23 de maio, unha proposta que pasa por "reforzar aqueles espazos municipalistas, progresistas e de esquerdas xa existentes, así como por impulsar candidaturas amplas e coalicións naqueles lugares onde aínda non existen, especialmente nas cidades".
O obxectivo, sostén, "blindar gobernos de progreso" ou "propiciar un cambio político" nos lugares onde actualmente goberna o Partido Popular.
Evitar a fragmentación da esquerda
Neste marco, Sumar Galicia considera que unha eventual reunión podería centrarse en seis puntos "de interese compartido". En primeiro lugar, recoñecéndose como "forzas políticas distintas, pero chamadas a entenderse", apunta a que é necesario "asumir a necesidade de cooperar para evitar a fragmentación do espazo da esquerda".
Tamén cre conveniente valorar a posibilidade de establecer uns puntos programáticos "mínimos" que puidesen servir de base para un 'Programa municipal da esquerda galega transformadora' que inclúa "mecanismos plurais, xustos e proporcionais á hora de confeccionar candidaturas, alí onde proceda".
Novas coalicións nas cidades
Do mesmo xeito, no caso das cidades, Sumar Galicia ve oportuno ratificar o apoio ás candidaturas xa existentes en Ferrol (Ferrol en Común), e en Santiago (Compostela Aberta). Ademais, propón explorar posibilidades de impulsar candidaturas mediante fórmulas de coalición en cidades como Vigo, A Coruña, Lugo, Ourense e Pontevedra.
Outro dos puntos que cre necesario valorar é "un apoio conxunto, efectivo e leal ás candidaturas progresistas" que xa contan con representación institucional, mencionando municipios como Noia, A Pobra do Caramiñal, Outes, Mondariz, Cambados, Monforte de Lemos, Ponteareas ou A Estrada.
Por todo iso, conclúe a carta enviada individualmente a cada formación por Paulo Carlos López, Sumar Galicia queda ao seu dispor para concretar "o formato, a data e o lugar" que consideren máis adecuado.
Esquerda Unida acepta o diálogo
Fontes de Esquerda Unida consideran positiva a proposta, polo que confirmaron que en canto sexa posible farán unha proposta de encontro.
Para a formación, este tipo de reunións poden servir para poder dar cobertura legal alí onde as agrupacións consideren adecuado establecer "algún tipo de coalición" con outras formacións, aínda que deixan claro que serán as entidades locais as que tomen esa decisión.
Sobre posibles acordos programáticos, Esquerda Unida subliña que están "abertos ao diálogo", lembrando que se atopan nun proceso de elaboración programática nas distintas localidades partindo da base dos programas dos anteriores comicios municipais e do programa marco de EU.
