Pontón augura que o BNG vai demostrar nas municipais que "non ten teito"

A voceira nacional do BNG, Ana Pontón, asegurou que a formación nacionalista "volverá demostrar" nas eleccións municipais do próximo mes de maio que está "en plena forma e non ten teito", asegurando que se consolidará como a forza política que "máis creza" nas corporacións locais.

Durante a súa intervención tras a reunión do Consello Nacional da organización, Pontón insistiu na necesidade de traballar "con máis ilusión ca nunca" co obxectivo de lograr un maior número de concelleiros e alcaldías.

Para alcanzar estas metas, a líder nacionalista remarcou que o BNG continúa avanzando "con paso firme" na súa folla de ruta electoral, confirmando que xa están elixidas as persoas que encabezarán as candidaturas en 94 concellos, incluídas as sete cidades galegas.

Así mesmo, Pontón avanzou unha axenda de mobilización para a cita electoral e que incluirá a celebración de tres encontros: unha cita específica enfocada nas grandes cidades, outra centrada nos gobernos e cogobernos da formación, e un grande encontro.

Nesta liña, a voceira nacional instou a "redobrar o traballo directo" coa cidadanía para "seguir consolidando o avance social e electoral do Bloque, chegando a todas as persoas que levan a Galicia na cabeza e no corazón".

O propósito, segundo concluíu, é demostrar diariamente que "o BNG serve para algo tan concreto e importante como que a xente deste país viva mellor".