María Pérez marcha cara a historia revalidando os seus dous ouros mundiais en Toquio
A granadina acadou o ouro en 20 quilómetros marcha, que suma ao dos 35 quilómetros de hai unha semana
A galega Antía Chamosa rematou a proba no sétimo posto
Foto: EFE
María Pérez acadou un novo ouro mundial nos 20 quilómetros marcha dos Mundiais de atletismo de Toquio, co que revalida os dous títulos de Budapest en 2023 e suma estes catro ouros ao olímpico que tamén posúe. A granadina impúxose cun tempo de 1h25:54, por diante da mexicana Alegna González (1h26:06) e da xaponesa Nanako Fuji (1h26:18)
María Pérez convértese con esta fazaña na primeira muller que defende con éxito dous ouros mundiais, e entra nun exclusivo grupo no que están tamén atletas da talla de Carl Lewis, Usain Bolt e Mo Farah. É xa a mellor atleta española que, ademais destes catro ouros, ten un europeo e o do relevo mixto por equipos nos últimos Xogos de París. Agora, a súa meta é o ouro individual nos Ánxeles.
A galega Antía Chamosa fixo unha boa carreira, e rematouna no sétimo posto cun tempo de 1h27:55, pechando a participación dos nosos atletas nestes campionatos, que non acadaron metais. Chamosa superou as súas propias expectativas, segundo afirmou despois, logo de facer "a carreira soñada".
A final masculina tamén deixou medalla para a delegación española. Acaouna Paul McGrath, cun tempo de 1h18:45, a dous segundos do chinés Wang, e a dez do brasileiro Caio Bonfim, novo campión mundial.
