Mantense suspendido servizo de Rodalies en Cataluña tras o accidente mortal de Gelida

O Govern catalán mantén a suspensión do servizo de Rodalies tras o descarrilamento dun tren da R4 en Gelida (Barcelona) o martes pola noite no que faleceu un maquinista en prácticas e causou 37 feridos de diversa consideración.

Anunciouno a conselleira de Territorio, Vivenda e Transición Ecolóxica, Sílvia Paneque, nunha comparecencia de prensa na que tamén compareceu a conselleira de Interior e Seguridade Pública, Núria Parlon, tras a reunión do comité técnico no Centro de Coordinación Operativa de Cataluña (Cecat), na sede da Consellería do Interior, para facer un seguimento da emerxencia.

A decisión tomouse "por criterios de seguridade para os usuarios e os propios traballadores de Renfe", sen poder determinar cando se restablecerá o servizo.

Paneque dixo que se están realizando "marchas brancas", unha inspección exhaustiva das infraestruturas ferroviarias, desde as 2:30 horas e que neste momento continúan estes traballos de revisión nas liñas de Rodalies, rexionais e media distancia.

Asegurou que na reunión pediron a Renfe e Adif "que non se escatimen esforzos" e que se redobren os recursos humanos e materiais para garantir a seguridade do sistema ferroviario no seu conxunto e que o restablecemento do servizo poida ser o máis rápido posible e anunciou unha nova reunión do comité técnico no Cecat ás 16:30 horas para volver valorar esta situación.

Non se teme pola vida de ningún ferido grave

A conselleira do Interior confirmou que ningunha das persoas feridas de gravidade no accidente ferroviario de Gelida se atopa en situación de risco vital e moitos dos 26 pasaxeiros con afectacións leves xa foron dados de alta.

No sinistro morreu un maquinista en prácticas de orixe sevillana de 28 anos, e cinco persoas resultaron feridas graves, seis menos graves e 26 leves.

Núria Parlon valorou a "moi boa coordinación" que houbo entre os operativos dos equipos de emerxencias, entre eles os Bombeiros e o Sistema de Emerxencias Médicas (SEM), que prestaron a "mellor atención" aos feridos máis graves e aos leves.

A suspensión do servizo deixa sen trens 400.000 persoas en Cataluña

A suspensión do servizo de Rodalies, Rexionais e Media Distancia en Cataluña complicou excesivamente este mércores a mobilidade en Cataluña ao deixar sen trens os 400.000 viaxeiros que utilizan esta rede de maneira habitual, e que tiveron que buscar alternativas para chegaren aos seus postos de traballo e seguir co seu día a día.

Moitos, como Paula e Marta, atopáronse a primeira hora coa sorpresa de que non tiñan trens nada máis chegar ás estacións. "Non sabía que había suspensión de trens e ía cara a Barcelona, onde está a miña oficina", relataron.

Algúns viaxeiros queixáronse da falta de información, xa que a web de Rodalies, segundo dixeron, non recollía a esa hora a interrupción do servizo, así como tampouco as pantallas da estación, que se atopaban en negro.

A alta velocidade, o bus e o metro; as alternativas no medio do caos

En contraste coa situación de Rodalies, o servizo de alta velocidade non se viu afectado este mércores, e os trens foron saíndo e circulando con normalidade, o que axudou a algún usuario que debía trasladarse a Lleida ou a Xirona a atopar alternativas para achegarse ao seu destino final.

En Xirona, Renfe reforzou o servizo de alta velocidade entre Barcelona e Figueres para ofrecer este medio de transporte aos viaxeiros que querían coller un tren desde a estación de Xirona.

A interrupción de Rodalies provocou ademais unha maior afluencia de viaxeiros na rede de autobuses e no Metro de Barcelona, que funcionaba máis lenta nalgunhas liñas.

Nas estradas, está habendo máis retencións das habituais. O Servizo Catalán de Tráfico (SCT) levantou as barreiras das peaxes na C-32 sur en ambas as direccións para evitar conxestións. As retencións non chegaron a superar os catro quilómetros e acumuláronse nos accesos a Barcelona.

O uso do vehículo privado incrementouse só un 6 % na área metropolitana de Barcelona respecto ao mesmo día de anos anteriores, segundo a Generalitat.

Para minimizar os problemas de mobilidade, a Generalitat recomendou á cidadanía que opte polo teletraballo sempre que sexa posible, mentres que a Universitat de Barcelona (UB) suspendeu os exames previstos para este mércores.

Outras universidades manteñen a actividade, aínda que aseguraron que serán flexibles cos estudantes afectados pola interrupción da circulación de trens.