Cae a bolsa en España un 0,47% nunha xornada marcada pola suba do prezo do petróleo
O IBEX 35 caeu 80,6 puntos, e no que vai de ano un 1,44% acumulado
Houbo caídas xeneralizadas nas principais prazas bolsistas de Europa
Vega Alonso / EFE
A bolsa española caeu un 0,47 % este venres e encadeou tres sesións consecutivas de retrocesos, aínda que sostivo o nivel dos 17.000 puntos, nunha xornada en que se rexistrou unha elevada volatilidade, que veu marcada polo prezo do petróleo e o xiro á baixa de Wall Street.
O índice de referencia do mercado nacional, o IBEX 35, caeu 80,6 puntos e pechou nos 17.059,3 puntos. No cómputo semanal, perdeu un lixeiro 0,09 % e no que vai de ano, retrocede un 1,44 % acumulado.
O selectivo español abría con perdas; posteriormente cotizou en positivo, animado polo retroceso no prezo do cru e o ton alcista de Wall Street; e despois volveu ao terreo negativo, cando o comportamento do petróleo e o da bolsa neoiorquina deron un xiro debido á guerra en Oriente Medio.
O petróleo brent subiu un 1,57%
O petróleo brent, de referencia en Europa, subía o 1,57 % ao peche dos mercados europeos e movíase nos 102,04 dólares o barril, despois de experimentar descensos na xornada (mínimo diario de 97,6 dólares) polo levantamento do veto ao cru ruso por parte de Estados Unidos.
En Europa, as principais prazas bolsistas pecharon con caídas xeneralizadas e París baixou o 0,91 %; Frankfurt, o 0,6 %; o índice Euro Stoxx 50, onde cotizan as empresas de maior capitalización europea, o 0,56 %; Londres, o 0,43; e Milán, o 0,31 %.
Wall street abría con ganancias, pero pronto daba a volta cara ao terreo negativo. Ao peche dos mercados en Europa, movíase con ton mixto e o índice Nasdaq baixaba o 0,7 %; o S&P 500, o 0,3 % e o Dow Jones, o 0,1 %.
Similitudes coa crise financeira de 2008
O analista de XTB Manuel Pinto afirmou que "os investidores comezan a establecer paralelismos entre a situación actual e a crise financeira de 2008", co foco de preocupación en "o mercado do crédito privado". En España, a inflación mantívose no 2,3 % en febreiro, sen variación respecto ao mes anterior.
O euro perdía a 0,6 % fronte ao dólar estadounidense e cambiábase en 1,1442 dólares, o seu nivel mínimo desde finais de xullo, polo fortalecemento do dólar como refuxio.
