Milleiros de persoas reclaman en Santiago unha sanidade pública mellor

Milleiros de persoas (50.000 segundo a organización, unhas 25.000 segundo a Policía Local e 15.000 de acordo co reconto da Policía Autonómica) percorreron as rúas de Santiago ata a praza do Obradoiro en defensa do sistema público de saúde.

Manuel Martín, portavoz da plataforma convocante SOS Sanidade Pública, subliñou ao inicio que o obxectivo é clamar fronte á "mestura imposible de incapacidade e de intención privatizadora" da Xunta en materia sanitaria.

A manifestación partiu da Alameda de Santiago tras a pancarta "Na defensa e a mellora da sanidade pública. Queremos a nosa atención primaria". O segundo lema, sostido por representantes políticos, rezaba: "Na defensa da sanidade pública. Salvemos a atención primaria".

Martín explicou aos medios que a mobilización é síntoma de que "a poboación galega non está disposta a que o seu sistema sanitario público, a súa atención primaria, acaben desmantelados e privatizados", pois "suporía a fin da sanidade pública, xa que é o eixo fundamental do sistema".

"A política do PP e da Xunta pretende a privatización seguindo os preceptos neoliberais e ten unha enorme incapacidade para xestionar os recursos. Hai unha mestura imposible de incapacidade e de intención privatizadora. Imos seguir loitando e pelexando para que esta situación acabe", salientou.

A súa entidade presentou unha iniciativa lexislativa popular con máis de 50.000 firmas de apoio, síntoma de que "a poboación se rebela contra unha situación inxusta", considera.

"Queremos un novo modelo de atención primaria, que sexa integral, que incorpore a profesionais como psicólogos, fisioterapeutas e traballadores sociais, que incremente as consultas de enfermería e que engada logopedia", declarou.

Segundo o portavoz da plataforma, en Galicia existe "incapacidade para acceder á atención primaria" e "gravísimos problemas de calidade asistencial", polo que o obxectivo é "recuperar o recortado", para o que a plataforma propón un modelo que a Xunta ten "nun caixón".

Sensación social de "preocupación"

O líder do PSdeG Valentín González Formoso asegurou que coa manifestación de Santiago, Galicia "explícalle" á Xunta a súa opinión sobre unha política sanitaria que vai "de ocorrencia tras ocorrencia e parche tras parche".

Segundo dixo ao comezo da mobilización, esta iniciativa chega "despois de moito tempo tentando que o Goberno da Xunta de Galicia, que o Partido Popular de Galicia, que Alfonso Rueda escoitase todas as propostas" expostas polo "mundo sanitario" e por partidos coma o seu.

"Despois dese silencio rotundo e despois de ocorrencia tras ocorrencia e parche tras parche e admitir e asumir unha deterioración que está a afectar a toda a sociedade galega, hoxe ímosllo a explicar doutra maneira", proseguiu.

González Formoso considera que a sensación social é de preocupación.

"Hoxe a sociedade galega, vai explicar aquí, na capital de Galicia, o que pensa desa aposta pola deterioración, esa aposta pola desvalorización e esa aposta pola privatización daquilo que máis queren os galegos e as galegas, que é o sistema sanitario, ese piar no estado de benestar e no seu sistema de vida", terminou.

"Pararlle os pés" ao PP

Pola súa banda, a portavoz nacional do BNG Ana Pontón afirmou que na manifestación emerxe "unha cidadanía con conciencia que lle está parando os pés ao Partido Popular" en materia sanitaria.

Ao comezo da protesta, Pontón asegurou que a de hoxe é "unha xornada emocionante e histórica neste país, onde miles de persoas cargadas de razóns e tamén coa forza do corazón veñen a defender a sanidade pública, a dicirlle ao Partido Popular que non van permitirlle que siga xogando coa súa saúde".

"Veñen a dicirlle xa abonda a un Partido Popular que se converteu nun perigo para a saúde dos galegos e as galegas, xa abonda aos recortes na sanidade pública, xa abonda ás listas de espera en atención primaria, xa abonda á precariedade do persoal da sanidade que nos coida e que temos que coidar e xa abonda de poñer en risco a saúde das persoas neste país", continuou.

Defendeu que "coa saúde non se xoga" e, por iso, observa "unha cidadanía valente que vén dicirlle ao Partido Popular que de nada lle vale a súa propaganda nin a súa manipulación, que o que quere é defender a sanidade pública porque nos vai a vida niso".

"O Partido Popular ten que escoitar, non pode seguir cabalgado na soberbia, cabalgado en mentiras e en insultar e atacar a cidadanía, que está a facer o que non fai o Goberno, que é defender a sanidade pública deste país. Un goberno que tivese razón e corazón hoxe escoitaría o que miles e miles de galegos están a dicirlle nun clamor que nos une á maioría deste país", declarou.

"Cálculo electoral"

O presidente da Xunta Alfonso Rueda considera que os partidos da oposición en Galicia só pensan este domingo na sanidade e fano por "un cálculo electoral" para os comicios municipais de maio.

Nun acto en Lalín, o titular do Goberno galego valorou a manifestación en defensa da sanidade pública convocada en Santiago de Compostela.

"Absoluto respecto aos que están aí pedindo melloras para a sanidade e dicirlles que é o que estamos a tentar facer", declarou.

Segundo dixo, a Xunta tomou medidas nos últimos meses e "algunhas son pioneiras en toda España", polo que cre que as van imitar "outras comunidades autónomas".

"É o que temos que facer nun momento moi complexo para a sanidade en todas as comunidades autónomas. Sabemos que o que está a suceder en Galicia, probablemente está a suceder con máis intensidade noutros lugares", proseguiu.

Rueda afirma que o seu Goberno fai "todo o posible" pola sanidade e insta aos partidos da oposición, que se sumaron á mobilización, a pensar máis na política sanitaria.

"Están clarisimamente pensando nas eleccións de maio e en tentar crispar. Van simplemente por un cálculo electoral e por pensar que coa sanidade se pode xogar", agregou.