Mala calidade do aire en varios puntos da provincia de Ourense polos incendios forestais
A área Sanitaria de Ourense pide aos cidadáns reducir a exposición, sobre todo as persoas con enfermidades respiratorias
O cambio de vento previsto favorecerá a mellora progresiva da calidade do aire nas próximas horas
Incendios forestais na provincia de Ourense
A calidade do aire en varios puntos da provincia de Ourense é mala debido ao fume dos incendios forestais do norte de Portugal. Segundo a información de Meteogalicia, as estacións de Xinzo de Limia e Gómez Franqueira teñen unha mala calidade do aire debido á presenza do contaminante PM10, formado por partículas sólidas ou líquidas de po, cinza ou feluxe.
A estación de Laza tamén reflicte unha mala calidade do aire por O3. Por iso, a área Sanitaria de Ourense pediu aos cidadáns reducir a exposición, especialmente en persoas con enfermidades respiratorias, manter as fiestras pechadas para que non entre fume, evitar facer exercicio físico ao aire libre, manterse ben hidratado e usar unha máscara FFP2 se se permanece no exterior durante tempo prolongado e hai moito fume.
Segundo as previsións meteorolóxicas, o cambio de vento previsto favorecerá a mellora progresiva da calidade do aire nas próximas horas.
