Máis de 27.000 persoas aspiran a obter unha praza na Garda Civil

Un total de 27.614 persoas aspiran a conseguir unha das 3.118 prazas ofertadas pola Garda Civil. Este sábado, comezaron as probas de coñecementos teóricos e psicotécnicos en vinte cidades, repartidas en doce comunidades autónomas.

O 32% son mulleres e a media de idade sitúase nos 27 anos. Unha de cada tres persoas que se presentan ao proceso posúe unha titulación universitaria, entre as que 980 contan con título de mestrado e 15 con doutoramento.

Ata o momento, superaron a fase de concurso na que se avaliaron os méritos de cada aspirante que cumpría cos requisitos esixidos: ter unha idade de entre 18 e 40 anos, nacionalidade española, carecer de antecedentes penais e contar como mínimo co título de educación secundaria.

Tras o exame teórico deste sábado (coñecementos xerais, idiomas, ortografía, gramática e psicotécnico), deberán facer unha proba física, unha entrevista persoal e un recoñecemento médico.

As sedes están situadas en Alacante, Ávila, Baeza, Cáceres, Cádiz, Xixón, Granada, As Palmas de Gran Canaria, León, Logroño, Madrid, Málaga, Mérida, Murcia, Palma de Mallorca, Santa Cruz de Tenerife, Sevilla, Valencia, Vigo e Zaragoza.

Probas físicas

Aquelas persoas que obteñan a puntuación suficiente convocaranse ás probas físicas: un circuíto de coordinación e axilidade, unha carreira de dous quilómetros, a realización dun número determinado de flexións segundo o sexo e unha proba de natación de 50 metros.

Despois, terán unha entrevista persoal co obxectivo de avaliar a súa idoneidade psíquica para o posto de traballo ao que optan e, no caso de superala, someteranse a un recoñecemento médico.

As persoas que consigan as 3.118 prazas ofertadas incorporaranse á Academia de Cabos e Gardas de Baeza (Xaén) e ao Colexio de Gardas Novos Duque de Ahumada de Valdemoro (Madrid).

Alí formaranse durante un curso académico que concluirá con 40 semanas de prácticas en unidades do Corpo.