Cambre recrea o seu propio belén vivente cun cento de veciños

Os Reis Magos chegaron, algo adiantados, este domingo ao belén vivente de Bribes, en Cambre. Alí case un cento de veciños recrean, cada ano, o nacemento de Xesús. 

Na representación que fan os veciños desta parroquia, a Virxe María e San Xosé chegaron ao antigo mosteiro de Bribes en lugar de chegar a Belén. Atoparon na horta e no patio deste lugar unha aldea completa na que non faltan artesáns nin labregos, e tamén o acubillo dos animais propios do portal para que nacese o neno Xesús.

"Eu levo vindo aquí desde que nacín, de feito fixen de Neno Xesús, e aquí estamos" di Selén, que fai de Virxe María

"É unha tradición da familia e imos xeración por xeración", di Anxo, que hoxe é San Xosé

Hai xa máis de 20 anos que a asociación de veciños organiza este belén, co apoio da Fundación Venancio Salcines e entre todos conseguen que participen varias xeracións.

"A miña tarefa é reclutar os nenos que cada vez é máis difícil, ensaiar e organizar os postos para que non haxa problemas", comenta Pili.

"É unha satisfacción para a parroquia que hoxe colabora moito. Antes andaba que andar detrás para que viñesen, e agora piden eles", di Manuel Martínez, presidente da Asociación de Veciños do Cruceiro.

A xornada rematou cun concerto de Nadal na igrexa de San Cibrao.