Máis de 20.000 estudantes galegos de FP cotizarán polas prácticas desde hoxe

458.000 alumnos de Formación Profesional -dos que máis de 20.000 están en Galicia- que realizarán prácticas de empresa en 2024 deberán cotizar por primeira vez á Seguridade Social a partir de hoxe, 1 de xaneiro, tras expirar a moratoria de tres meses que pediron no seu día a maioría das autonomías e que aínda hoxe defenden aprazar de novo a súa implantación.

A cotización estará bonificada ao 100 % en 2024, nun 95 % pola Seguridade Social e o restante 5 % polo Ministerio de Educación, Formación Profesional e Deportes.

Hai uns días, a secretaria xeral de Formación Profesional, Clara Sanz, reuniuse cos directores xerais de FP das comunidades e os directores provinciais da Tesourería Xeral da Seguridade Social, para tratar sobre a cuestión.

Esta medida supoñerá que os alumnos de FP coticen polo tempo de prácticas que fagan nas empresas, que será de polo menos o 25 % das horas lectivas, segundo marca a Lei de Formación Profesional.

Tamén os estudantes universitarios que realicen prácticas, uns 400.000 en toda España, deberán cotizar por esa formación a partir deste 1 de xaneiro, e esa cotización tamén estará bonificada polo Goberno ao 100 %. 

En declaracións a EFE, a presidenta da Comisión Sectorial de Asuntos Estudantís de Crue Universidades, María Antonia Peña, explicou a final de ano que aínda se estaban resolvendo coa Tesourería da Seguridade Social "moitas dúbidas técnicas".

Á Crue, asociación que agrupa a maioría das universidades españolas e que estima que hai unhas 400.000 prácticas curriculares cada ano, inquiétaa tramitar ese inxente volume, prácticas que en moitos casos son obrigatorias e sen as cales o estudante non se pode graduar.

A normativa establece que sexan as empresas e as institucións públicas e privadas as encargadas de tramitar as cotizacións, pero tamén di que iso será así "salvo que os convenios digan o contrario".