Máis de 13.000 policías e gardas civís despregaranse para a visita do papa a España

Arredor de 11.000 policías nacionais e uns 2.200 gardas civís, aos que se sumarán efectivos dos Mossos d'Esquadra, da policía canaria e axentes das policías locais que conformarán o dispositivo de seguridade con motivo da visita do papa a España entre o 6 e o 12 de xuño.

A pouco máis dun mes da chegada de León XIV a España - a Madrid, Cataluña e Canarias-, o ministro do Interior, Fernando Grande-Marlaska, presidiu este luns a reunión xeral de coordinación entre todos os departamentos, organismos e institucións que intervirán no dispositivo de seguridade.

Un operativo que ten catro fases: a previa, iniciada desde que se confirmou a visita; unha preventiva, que dará comezo na medianoite do 31 de maio; a fase de alerta, desde o 1 de xuño e finalmente a fase crítica que se desenvolverá desde horas antes de que o papa pise chan español ata que o abandone en Canarias o 12 de xuño.

Marlaska salientou que o operativo está deseñado para garantir que esta visita "sexa un éxito", tendo en conta que España e os corpos policiais españois son un "referente" en materia de seguridade tras a eficacia demostrada en eventos complexos como o cumio da OTAN que se celebrou en 2022 Madrid, os máis de 22.000 actos celebrados con ocasión da Presidencia da Unión Europea en 2023 ou o cumio da ONU en Sevilla do pasado mes de xullo.