Bolaños demanda a Aldama por vulnerar o seu dereito á honra ao dicir que o intentou subornar

O ministro da Presidencia, Xustiza e Relacións coas Cortes, Félix Bolaños, presentou no Tribunal de Instancia de Madrid unha demanda contra o empresario investigado no caso Koldo Víctor de Aldama por vulnerar o seu dereito á honra ao afirmar en programas de televisión que lle intentou subornar.

Segundo adiantou eldiario.es e confirmaron a EFE en fontes do Ministerio Félix Bolaños reclama 70.000 euros por danos e prexuízos a Víctor de Aldama, que está a ser xulgado estes días no Tribunal Supremo pola trama das Máscaras xunto co exministro de Transportes José Luis Ábalos e o exasesor deste Koldo García. Víctor de Aldama dixo o pasado mes de febreiro en Telemadrid en referencia a Bolaños: "Púxose en contacto para silenciarme e para subornarme dalgún xeito pagándome unha cantidade moi alta".

Bolaños reclama a Aldama que se absteña de realizar afirmacións de igual tenor ou no mesmo sentido "xa sexa en medios de comunicación (televisivos, impresos ou dixitais), en plataformas dixitais (webs e redes sociais) ou por calquera outra vía". Tamén que se condene o demandado á publicación do encabezamento e ditame da sentenza que recaia no presente procedemento nas súas redes sociais, particularmente na súa conta da rede social X e que se lle condene a pagar 70.000 euros en concepto de indemnización por danos e prexuízos, maáis os intereses que legalmente se devindiquen.

Bolaños sostén que "non coñece nin falou nunca nin ten nin tivo relación privada ningunha co demandado nin co seu responsable de comunicación". E insiste en que a súa relación privada "é total e absolutamente inexistente”, que "nunca mantivo unha conversación nin telefónica nin de ningún outro tipo con Aldama nin co seu responsable de comunicación, e nin sequera ten os seus números de teléfono”.

Aldama difundiu na rede social X que Bolaños asistira a unha festa de aniversario de José Luis Ábalos sendo este aínda ministro na que tamén estivo o empresario que se celebrou nun restaurante da súa propiedade en decembro de 2019.

Neste sentido, o escrito de Bolaños sinala que "a única evidencia" que achegou Aldama para soster publicamente que o demandante o coñecía é unha fotografía que, segundo manifesta, sería tomada nese restaurante, na que, por certo, "nin sequera aparece o empresario".

E Bolaños lembra ademais que Aldama recoñeceu, antes de acusalo en varios programas de televisión e nas súas redes sociais de intento de suborno, "non coñecelo de nada" nunha entrevista na Cope o 27 de novembro de 2024. Unha contradición que na demanda se considera "tan evidente que non deixa lugar a dúbidas acerca da falsidade de todo o seu relato e dinamita por completo a xa exigua credibilidade do demandado".