Taboadela, Otero, Rodríguez Dacosta e Losada, cabezas de listas do PSdeG ao Congreso

Obdulia Taboadela, Patricia Otero, Carmen R. Dacosta e Abel Losada foron propostos para encabezar as listas do Partido Socialista polas provincia da Coruña, Lugo, Ourense e Pontevedra, respectivamente, tras recibir o visto e prace dos comités provinciais e a falta da súa ratificación por parte da dirección federal.

No Senado queda fóra o exalcalde, Xosé López Orozco, que se postulaba como cabeza de cartel por Lugo.

A subdelegada Obdulia Taboadela encabeza a candidatura pola Coruña

Pola Coruña, tal e como aprobou o comité provincial, a actual subdelegada do Gobierno na provincia e ex-deputada no Congreso, Obdulia Taboadela, encabezará a lista á Cámara baixa. Acompañarana o concelleiro de Ferrol Julián Reina, como número dous; a secretaria xeral das Xuventudes Socialistas, Ana Alvite como tres; e o edil de Porto do Son, Jorge Romero, no catro.

Queda fóra da candidatura a que foi subdelegada do Gobierno María Rivas, quen se postulaba para liderar a candidatura co apoio da alcaldesa da Coruña, Inés Rey. Ao respecto, fontes consultadas por Europa Press aseguraron que na reunión do comité provincial o secretario xeral, Bernardo Fernández, xustificou o feito de que fose Taboadela a número 1 ao obter o "dobre de votos" nas agrupación locais.

Mentres tanto, a candidatura ao Senado estará encabezada polo portavoz do PSOE no Concello de Santiago, Guimersino Guinarte, un dos dous concelleiros que se mantivo fiel á dirección local durante a crise que o partido atravesou na capital galega. Por detrás del irán a edil de Culleredo Cristina Pardo e o socialista de Valdoviño Alejandro Antonio García.

Patricia Otero repite por Lugo

En Lugo a número un ao Congreso será Patricia Otero, quen ocupou esta última lexislatura o escano na Cámara baixa que deixou o líder do PSdeG, José Ramón Gómez Besteiro, ao ser elixido parlamentario autonómico. Deste xeito, dará continuidade ao traballo desenvolvido ata o de agora.

Seguen a Patricia Otero na candidatura o concelleiro en Lugo Jorge Bustos, a secretaria xeral das Xuventudes na provincia Eva Blanco, e o socialista das Nogais, Ismael Carcedo.

Pola súa banda, non hai sorpresas na lista ao Senado e César Mogo, próximo ao líder do PSOE Pedro Sánchez, figura como primeiro candidato. Séguenlle a portavoz do PSOE no Concello de Lugo, Ana González Abelleira, e o alcalde de Ribas de Sil, Roberto Castro González.

Deste xeito, tampouco aparece na candidatura socialista ao 29N o exalcalde de Lugo, Xosé López Orozco, quen se postulaba nos últimos días como candidato ao Senado. Fontes consultadas por Europa Press sinalaron que no comité provincial de Lugo trasladouse que Mogo recibira moitos máis apoios que Orozco para ocular o posto.

Unha deputada autonómica, cabeza de lista por Ourense

Unha das principais novidades que se observan nas candidaturas do PSOE polas provincias galegas é precisamente a de Ourense, tendo en conta que implicará cambios na composición do Grupo Parlamentario do PSdeG no Pazo do Hórreo.

Así, tras a decisión da que fóra cabeza de lista ao Congreso nas eleccións de 2023, Margarita Martín, de non volver postularse, será número un a actual deputada autonómica Carmen Rodríguez Dacosta.

Deste xeito, se resulta elixida, a súa marcha implicará cambios no grupo dos socialistas no Parlamento de Galicia, sendo o seguinte na lista coa que o PSdeG concorreu ás últimas autonómicas o exalcalde de Rivadavia, Ignacio Gómez.

Tras Rodríguez Dacosta, ocupa o segundo posto na lista do PSOE pola provincia de Ourense o concelleiro de Amoeiro e coordinador comarcal do PSOE, Brian Diz Gonzalez.

Tamén hai novidades na candidatura pola provincia ao Senado, tendo en conta que o actual senador Rodríguez Villarino pasa de ser o cabeza de lista, que ocupará a edil ourensá María Fernández, a ser o número dous.

O subdelegado do Goberno, candidato por Pontevedra

Pola súa banda, a candidatura ao Congreso pola provincia de Pontevedra está encabezada polo subdelegado do Gobierno Abel Losada (Vigo), un posto que nos comicios de 2023 ocupou o actual secretario xeral do PSOE provincial, David Regades.

A candidatura continúa, por orde, con Margarita Adrio (Pontevedra), Manuel Pazos (Marín), Tania García (Vilagarcía), Ángel Rivas (Vigo), Digna Rivas (Redondela) e David Alonso (O Porriño).

Pola súa banda, a cargo da candidatura á Cámara baixa por Pontevedra repite Carmela Silva Rego (Vigo), seguida por José Cacabelos Rico (O Grove) e Olga Alonso Suárez (Vigo).

A executiva e o comité celebrados na tarde deste mércores na provincia estiveron presididos por por a vicesecretaria xeral provincial, Paula Fernández, ante a ausencia por motivos familiares de David Regades.

Aprobación definitiva o sábado no Comité Federal

Coas propostas de candidaturas aprobadas este mércores polos comités provinciais, as listas pasarán agora á dirección galega para que emita o seu informe, previo á análise o venres na Comisión Federal de listas, último paso antes da aprobación definitiva por parte do Comité Federal do PSOE, que se reúne o vindeiro sábado, día 17 de outubro.