Borja Sémper reincorpórase ao Comité de Dirección do PP tras superar un cancro
O político vasco anunicou en decembro pasado que finalizara o tratamento contra un cancro de páncreas
Borja Sémper e Alberto Núñez Feijóo este luns durante a reunión do Comité de Dirección do PP (EFE/David Mudarra)
O vicesecretario de Cultura do Partido Popular, Borja Sémper, incorporouse este luns ao Comité de Dirección do partido, tras pasar dez meses fóra da primeira liña política por mor dun cancro.
O PP difundiu este luns unhas fotografías en que aparece o político ovacionado polos seus compañeiros, entre eles o presidente da formación, Alberto Núñez Feijóo.
O tamén portavoz do PP non ofrecerá, con todo, a conferencia de prensa semanal deste luns en Génova, na que comparecerá o vicesecretario de Política Autonómica e Municipal e Análise Electoral, Elías Bendodo.
O político vasco anunciou que padecía cancro o 14 de xullo do ano pasado e en xaneiro puido verse na reunión do Comité de Dirección do PP, aínda que non se reincorporou porque aínda tiña que afrontar parte do tratamento.
O pasado 8 de decembro foi o propio Sémper quen informou de que terminara o tratamento de quimioterapia contra o cancro de páncreas.
