O xuízo das máscaras entra na recta final coa declaración de Ábalos

O xuízo ao exministro de Transportes José Luis Ábalos entra este luns na recta final coa súa declaración no Tribunal Supremo. O exdirixente socialista responderá as acusacións do comisionista Víctor de Aldama, que o sinala polo cobro de comisións dirixidas, dixo, a financiar o PSOE.

O que foi secretario de Organización do Partido Socialista, actualmente en prisión preventiva, enfróntase a unha petición de 24 anos de cárcere por presuntos amaños nos contratos de máscaras.

Farao despois de que Aldama acusase o presidente do Goberno de estar no escalafón 1 da "banda organizada" e a Ábalos no número dous, por ser quen daba e outorgaba e por cobrar comisións de construtoras para financiar o partido mediante doazóns, segundo dixo no Supremo.

Aldama, que decidiu colaborar mentres estaba en prisión preventiva por unha fraude en hidrocarburos pola que segue investigado, cifrou entre 3,5 e 4 millóns de euros as cantidades aboadas ao exministro e ao seu exasesor Koldo García, tamén acusado, ademais de pagarlles 10.000 euros mensuais para gastos fixos.

As interrogantes que deberá responder Ábalos

Por primeira vez desde que está en prisión provisional escoitarase a versión do exministro e exdeputado.

Ábalos terá que explicar se interveu no proceso de adxudicación á empresa da trama, Soluciones de Gestión, de contratos millonarios de máscaras de dous entes dependentes do Ministerio de Transportes, e especialmente se tivo algo que ver coa orde de dobrar en 38 minutos o material sanitario que adquiriu Portos do Estado.

Sobre Ábalos pesa tamén a acusación de influír na contratación da súa exparella Jéssica Rodríguez e de Claudia Montes en tres empresas públicas e o presunto pago, por parte da trama, do piso onde viviu a súa exparella en Madrid ou o alugueiro dun chalé en Cádiz.