Máis de 100.000 persoas asistirán esta fin de semana en Santiago ao Son do Camiño

Máis de 100.000 persoas acudirán a partir deste xoves ao Monte do Gozo, en Santiago de Compostela, para asistir a un dos festivais máis multitudinarios de Galicia, o Son do Camiño.

Os preparativos estanse ultimando para albergar os concertos de artistas como Franz Ferdinand, Bryan Adams, Duki, Amaia, Bad Gyal, Estopa ou The Prodigy.

O festival compostelán, que arrincará este xoves e estenderase ata o sábado, xa vendeu o 98 % das súas entradas e esgotou todos os seus abonos excepto os VIP e os dirixidos a menores de nove anos.

En canto ás entradas diarias, aínda quedan dispoñibles para as xornadas do xoves 12 e o venres 13, mentres que as do sábado están esgotadas.

Desde a organización do festival esperan vender o 100 % das entradas e alcanzar unha cifra aproximada de 130.000 persoas, similar á da pasada edición, nunha cita musical que na súa sexta edición xa se consolidou como unha das dez con maior afluencia en España.

A ocupación media nos hoteis da cidade supera o 90 % e mesmo alcanza o 100 % nos establecementos hostaleiros máis próximos ao recinto do festival.

O Son do Camiño contará na súa sexta edición con máis de corenta actuacións de artistas e bandas tanto nacionais como Mikel Izal, Nil Moliner, Galician Army, Filloas, Bad Gyal, Kase.O, Amaia, Carolina Durante, Siloé, Estopa, Amaral ou The Rapants; como internacionais, como Franz Ferdinand, Steve Aoki, Duki, Bryam Adams, Kasabian ou The Prodigy.

O evento contará cun forte operativo no que participarán máis de 300 efectivos entre Policía Nacional, Garda Civil de Tráfico, Bombeiros e Protección Civil para garantir a seguridade no recinto.

Desde o Concello de Santiago explicaron que se manterán os autobuses lanzadeira de anos anteriores así como o plan de circulación que xa lle foi comunicado á veciñanza, que xa recibiu tamén as tarxetas de paso correspondentes.

Produciranse cortes de tráfico nas rúas das Estrelas, Gozo, San Martiño e Agra dos Campos desde as 12:00 horas do xoves ata as 05:00 do domingo, excepto para coches de emerxencias ou autorizados.