Máis da metade dos polígonos bateeiros galegos, pechados por un cóctel de toxinas
Xuntáronse nas diferentes rías a lipofídica, a diarreica, habitual neste tempo, coa ASP e a PSP, máis perigosas para a saúde
De momento, salvou o mexillón da ría de Ares e Betanzos e o interior da Arousa
O 73% dos polígonos bateeiros galegos están pechados por toxinas.
Entraron coma un ciclón, e quizais algo antes do esperado.
"Comezou un episodio de ASP, que despois continuou con outro de lipofídica, de maneira que non permitiu a reapertura dos polígonos que estaban afectados inicialmente coa ASP e agora temos nalgunha ría tamén PSP", confirma Xosé Morales, Subdirector do Intecmar
Todo un cóctel explosivo. A lipofílica, ou diarreica, non colle por sorpresa o sector.
"Nesta temporada sempre soe estar pechado. É normal que en setembro estea a ría pechada pero levamos pechados dende finais de agosto", lamenta Carmen Díaz, da Asociación de meixolleiros de San Cibrán
Tampouco desconcerta a aparición da PSP, a toxina paralizante, habitual en Baiona e Camariñas.
Cousa distinta é a ASP, a amnésica, máis excepcional. Como máis excepcional é que estean as tres á xunta. Cada unha, cunha incidencia distinta en segundo que ría.
"As toxinas PSP ou a ASP son máis graves que a lipofílica. Xestionámolo mellor cando aparece só un tipo de toxina lipofílica pero neste momento apareceron as tres e complica un pouco a xestión de aperturas e peches", engade Morales.
O resultado é que máis da metade dos poligonos están pechados. Salvaron de momento os da ría de Ares e Betanzos, e tamén o interior da Arousa, onde cruzan os dedos para que o vento do sur non lles xogue unha mala pasada.
"As do interior da Ría de Arousa son as menos afectadas historicamente pero se continúan os ventos do sudoeste e as condicións que estamos tendo neste momento poderían chegar a estar afectadas tamén por toxina lipofílica", advirte o subdirector do Intecmar.
A aparición de toxina nesta época non é casualidade.
"Os ventos e a ausencia de afloramento neste momento é unha combinación de factores que favorece que se multipliquen as células de fitoplacton en todo o interior da ría e cause este tipo de toxicidade", explica Xosé Morales.
Con todo, hai que dicir que si hai mexillón nas prazas. Pouco, pero seguro e de bo tamaño.
