España rexistra 41 casos de menores enfermos por tomar leite de fórmula contaminada

O Ministerio de Sanidade informou o Centro Europeo para a Prevención e o Control das Enfermidades da notificación en España de 41 casos de menores con síntomas gastrointestinais que foron asociados ao consumo de fórmulas infantís retiradas por posible contaminación coa toxina cereulida, producida por 'bacillus cereus'.

A notificación realizouse, segundo informou Sanidade, no marco da coordinación coas comunidades autónomas, ás que se solicitou que comunicasen os casos compatibles ao Centro de Coordinación de Alertas e Emerxencias Sanitarias e ao Centro Nacional de Epidemioloxía (CNE). 

Os 41 casos comunicados foron notificados por dez comunidades autónomas: Andalucía, Aragón, Canarias, Castela-A Mancha, Castela e León, Cataluña, Galicia, Murcia, A Rioxa e Comunitat Valenciana.

Os bebés que presentaron síntomas tiñan unha media de 4 meses de idade 

Todos o casos, cunha media de idade de 4 meses, presentaron síntomas gastrointestinais, principalmente vómitos e diarrea, con ou sen outros síntomas asociados. Ademais, notificáronse outros dez casos con síntomas compatibles que consumiron produtos das marcas retiradas, aínda que en nove deles non foi posible identificar o lote de fórmula infantil consumido.

En canto á súa evolución, 13 dos 41 casos requiriron hospitalización, aínda que todos eles foron dados de alta. Unicamente un deles precisou ingreso nunha unidade de coidados intensivos ao presentar, ademais da sintomatoloxía gastrointestinal, unha infección respiratoria.

O ministerio lembra que a Axencia Española de Seguridade Alimentaria e Nutrición (AESAN) veu informando a través de sucesivas alertas sobre a retirada destes produtos, en coordinación coas autoridades competentes e no marco dos mecanismos europeos de intercambio rápido de información.

Diferentes países da Unión Europea comunicaron a identificación de casos que poderían estar relacionados con este evento. Con todo, Sanidade subliña que, polo momento, non se dispón dunha definición de caso común a nivel da UE.