Macron volve nomear a Lecornu como primeiro ministro de Francia
Lecornu pide poñer fin á inestabilidade política que prexudica a imaxe de Francia
Asegura que a súa prioridade será aprobar os Orzamentos e atender os problemas cotiáns da cidadanía
Sébastien Lecornu/Abdul Saboor/Reuters
O presidente de Francia, Emmanuel Macron, volveu nomear este venres a Sébastien Lecornu, que dimitira o pasado luns, como primeiro ministro, tras unha xornada de negociacións para sacar o país do bloqueo político no que se atopa.
O político macronista de 39 anos presentara a súa renuncia ao considerar que “non se daban as condicións” para continuar no cargo.
Lecornu afirmou que “hai que poñer fin á inestabilidade política que dana a imaxe de Francia e os seus intereses” e adiantou que o seu equipo de Goberno estará composto por persoas sen ambicións para as presidenciais de 2027.
“Farei todo o que estea na miña man para dotar Francia dun Orzamento ata finais de ano e para responder aos problemas da vida cotiá dos nosos compatriotas”, declarou Lecornu nas redes sociais nas súas primeiras palabras tras ser nomeado xefe de Goberno por segunda vez en apenas un mes e só catro días despois de dimitir.
