Lugo prepárase para celebrar o Arde Lucus
A festa que recrea os tempos da fundación da cidade celebrarase entre o 12 e o 15 de xuño
Comezou en Lugo a montaxe dos campamentos do Arde Lucus, a festa que a semana vindeira recreará os tempos da fundación da cidade. Ata unha vintena de asociacións ocúpanse destes labores, sobre todo cara á fin de semana.
"Entre o sábado e o domingo vai estar todo montado como vai estar durante toda a festa", apunta Manuel Buján, do Senado de Lugo.
"O campamento témolo xa a medio montar, que empezamos xa a fin de semana pasada. E continuaremos esta semana ata que empece o Arde Lucus", engade Ángel Rouco, das Trebas Galaicas.
"O sábado e o domingo estaremos montando no parque de Rosalía, onde temos a castra", di, pola súa banda, Víctor Rodríguez Ferreiro, do Clan de Breogán.
"Estamos montando rapidiño para ter listo o campamento para as visitas escolares", conclúe Eduardo Fernández Abel, da Cohors III Lucensium.
Traballo arreo é o que teñen tamén nas tendas de traxes e complementos tanto de galaicos como de romanos. Contan con mercadorías para todos os petos, incluídas as pezas de artesanía.
"Abrimos só un mes e meu home fai as cousas durante todo o ano para vender este mes complementos e traxes, tanto de celta como de romano", sinala a comerciante Elena Ferreiro.
"A artesanía que facemos para o Arde Lucus gústame moito, porque despois vexo a clientela e van todos guapísimos", expresa a artesá Queka Alonso.
Tocante á ocupación prevista, os hoteis xa colgaron o cartel de completo tanto para o venres coma para o sábado.
"A verdade é que xa hai tempo. Se cadra hai dous meses que xa non quedan cuartos. Si quedan para as noites do xoves e do domingo", explica Alba Álvarez, directora dun hotel do centro da cidade.
"Temos 40 dormitorios aquí, con todo cheo. Un grupo de portugueses vén todos os anos, que repite. E de momento temos todo ao cen por cento", sinala a hostaleira María Rodríguez.
Con máis de 300 actividades programadas, a Festa do Arde Lucus, declarada de interese turístico internacional, celebrarase entre os días 12 e 15 de xuño.
Ritual galaico exhibido nunha edición anterior da festa
