Localizado o cadáver dun veciño de Vigo desaparecido hai once días
Polo de agora descoñécense as causas que lle puideron provocar a morte, á espera dos resultados da autopsia
Unha persoa localizou este mércores o corpo sen vida dun veciño de Vigo, José Miguel Fernández Roldán, de 55 anos, que faltaba desde o pasado 19 de abril. A súa familia denunciara a súa desaparición ante a comisaría de Policía da cidade.
O achado produciuse nun descampado na rúa Vista do Mar, na parroquia de Teis. A súa identidade xa foi confirmada.
O corpo foi trasladado a dependencias do Imelga para practicárenlle a autopsia. Descoñécense as causas que puideron provocar o seu deceso e se o cadáver presentaba sinais de violencia, á espera de que se efectúen os estudos pertinentes.
Tras a denuncia da súa desaparición, a asociación SOS Desaparecidos emitiu unha alerta facilitando datos sobre a súa descripción. Entre outras cousas, sinalábase que se trataba dunha "persoa vulnerable".
